ކުޑަ ކަމަކުން ވެސް ގިނަ ދަރުމަ ހޯދިދާނެ.

ފަސްވަނަ އެޕިސޯޑުގައި ޝެއިޙް އިލްޔާސް ޖަމާލް ވާހަކަފުޅު ދެއްކެވީ ރީތި އަޙުލާޤުގެ މާތްކަމާ ގުޅޭގޮތުން.

ކީރިތި ރަސޫލާ ޙަދީޘްކުރައްވަނީ:

Advertisement

(إِنَّ المُؤْمِنَ لَيُدْرِكُ بِحُسْنِ خُلُقِه درَجةَ الصَّائمِ القَائمِ) صحيح أبي داود  

މާނައީ: "ހަމަކަށަވަރުން މުއުމިނު އަޅާއަށް އޭނާގެ ރީތި ޚުލްޤުގެ ސަބަބުން ސުންނަތް ރޯދަހިފައި ރޭއަޅުކަންކޮށް އުޅޭ މީހާގެ ދަރަޖައާ ހަމައަށް ފޯރާނެއެވެ."

ލޮބުވެތި މުސްލިމު އަޚުންނާއި އުޚްތުން! ކިތައް ކިތައް މީހުންތޯ މި ރޯދަމަހުގައި އެކި އަޅުކަންތައްކުރުމުގައި މަޝްޣޫލުވެ އުޅެނީ. އެކަމަކު އޭނާގެ ރީތި ޚުލްޤެއް ނެތް. އަނބިދަރީންނާ މުޢާމަލާތްކުރަނީ ވަރަށް ނުބައިކޮށް. މައިންބަފައިންނަށް އުރެދޭ. ކިބުރުވެރިވޭ. އެހެން މީހުން ކުޑައިމީސްކުރޭ. ދުލުން ހަޑި ބަސްތައް ބޭރުކުރޭ. ދޮގުހެދުމާއި އޮޅުވާލުމުގައި އޭނާ ވަނީ ހައްދުފަހަނައަޅައި ގޮސްފައި. އެފަދަ މީހާ ކުރާ ގިނަ ގުނަ އަޅުކަމުގެ ބުރަދަނެއް ނުހުރޭ. އެއަށްވުރެ ޚުލްޤު ހެޔޮ މީހާ ކުރާ މަދު އަޅުކަމުގެ ބުރަދަން މާބޮޑު.

އަދި ޚުލްޤު ހެޔޮ މީހާގެ ޚުލްޤުގެ ރީތިކަމުން ގިނަގިނައިން ސުންނަތް ރޯދަހިފައި، ރޭ އަޅުކަންކުރާ މީހެއްގެ ދަރަޖައާހަމައަށް އޭނާއަށް ވާޞިލްވެވޭ. އަދި ކިއެއް އޭނާއަކީ ޤިޔާމަތްދުވަހުން ކީރިތި ރަސޫލާއާ އެންމެ އަރިސް މީހެއް ކަމުގައި ވެވޭ.

އެހެންކަމުން އަޅުގަނޑުމެންގެ އަޚްލާޤް ރީތިކޮށްގެން މަތީ ދަރަޖައާ ހަމައަށް ވާޞިލުވުމަށް ގަދައަޅާ މަސައްކަތްކުރަމާތޯ!