ކުރިޔަށް އޮތް ރައްޔިތުންގެ މަޖިލީހުގެ އިންތިޚާބުގައި ރާއްޖެއިން ބޭރުުގައި ވޯޓުފޮށިތައް ބަހައްޓާނީ ތިން ޤައުމެއްގައި ކަމުގައި އިލެކްޝަންސް ކޮމިޝަނުން ވިދާޅުވެއްޖެއެވެ.

އެކޮމިޝަނުން ވިދާޅުވީ، ރީރެޖިސްޓްރީ ކުރުމަށް ހުޅުވާލި ފުރުޞަތުގައި، ވޯޓު ފޮށިތައް ބެހެއްޓުމުގައި ކަނޑައަޅާފައިވާ އަދަދަށް މީހުން ރީރެޖިސްޓްރީކޮށްފައި ވަނީ ތިން ޤައުމަކުން ކަމަށެވެ. އޭގެ ތެރޭގައި ހިމެނެނީ، އިންޑިއާ ސްރީލަންކާ އަދި މެލޭޝިއާއެވެ.

އިލެކްޝަންސް ކޮމިޝަނުން ހާމަކޮށްފައިވާ ތަފާސް ހިސާބުގައި ވާ ގޮތުން އެންމެ ގިނަ މީހުން ވޯޓުލުމަށް ރަޖިސްޓްރީ ކޮށްފައި ވަނީ މެލޭޝިއާގެ ކުއާލަލަމްޕޫރަށެވެ. އެފޮއްޓަށް 702 މީހުން ރަޖިސްޓްރީކޮށްފައިވެއެވެ. ދެވަނައަށް އެންމެ ގިނަ މީހުން ވޯޓުލުމަށް ރަޖިސްޓްރީ ވެފައި ވަނީ ސްރީލަންކާގެ ކޮލަމްބޯއަށެވެ. އެއީ 306 މީހުންނެވެ. އިންޑިއާގެ ޓްރެވިންޑްރަމްގައި ވޯޓުލުމަށް ރަޖިސްޓްރީ ކޮށްފައި ވަނީ 159 މީހުންނެވެ.

ރީރެޖިސްޓްރީ ވުމަށް ހުޅުވާލި ތަންތަނުގެ ތެރެއިން އިނގިރޭސި ވިލާތުގެ ލަންޑަނުގައި ވޯޓުލުމަށް 124 މީހުން ރެޖިސްޓްރީ ކުރިއެވެ.

މިހާރު ހަމަޖެހިފައިވާ ގޮތުން ރައްޔިތުންގެ މަޖިލީހުގެ އިންތިޚާބު އޮންނާނީ، މިއަންނަ އޭޕްރީލް މަހުގެ 21ވާ އާދީއްތަ ދުވަހުގައެވެ.