މިޤައުމު މިދަނީ ވަރަށް ނުބައި ދިމާލަކަށް ކަމަށް ވިދާޅުވެ އެމްޑީޕީގެ ޗެއާ ޕަރސަން ފައްޔާޒް އިސްމާޢިލް މިސަރުކާރަށް ފާޑު ވިދާޅުވެއްޖެއެވެ.

އެމްޑީޕީގެ މިސްރާބު ހަމަ މަގަށް ކެމްޕޭންގެ ތެރެއިން، ރައްޔިތުންގެ މަޖިލީހުގެ ތިމަރަފުށީ ދާއިރާގެ އެމްޑީޕީ ކެންޑިޑޭޓް ފަތުޙުއްﷲ ޖަމީލުގެ ޖަގަހަ ޖަލްސާގައި ވާހަކަފުޅު ދައްކަވަމުން، ފައްޔާޒް ވިދާޅުވީ، ރައިސުލްޖުމްހޫރިއްޔާ، ޑރ. މުޙައްމަދު މުޢިއްޒުގެ ސަރުކާރާއިއެކު ޤައުމު މިހާރު މިދަނީ ވަރަށް ނުބައި ދިމާލަކަށް ކަމަށެވެ. ފައްޔާޒް ވިދާޅުވީ، ޕްރޮޖެކްޓްތައް ނުހިންގުމުގެ އިތުރުން، އާއްމު ތަންތަނުގައި ސިޔާސީ ވާހަކަތައް ނުދެކެވޭ ހިސާބަށް ކަންކަން ގޯސްވެގެންދާނޭ ކަމާއި މެދު ޝައްކު ނުކުރައްވާ ކަމަށެވެ. 

އެމްޑީޕީގެ ޗެއާޕާރސަން ފައްޔާޒް އިސްމާޢީލް ވިދާޅުވީ، ނޫސްތަކުގައި ތަޅުއަޅުވަން ރައީސް މުއިއްޒުގެ ސަރުކާރުން މަސައްކަތް ކުރައްވާފައިވާ ކަމަށާއި، އެކަން ހުއްޓަވާލައްވަން ޖެހިވަޑައިގަތީ މަޖިލީހުގައި އެމްޑީޕީގެ މެޖޯރިޓީ އޮތުމުން ކަމަށެވެ.

ފައްޔާޒް ވިދާޅުވީ، ކޮމިޝަނަރ ޖެނެރަލް އޮފް ޓެކްސޭޝަންގެ މަޤާމުން ފަތުހުﷲ ޖަމީލް އިސްތިޢުފާ ދެއްވުމުން، އެމަޤާމަށް އަލުން ޔަޒީދު އައްޔަނުކުރެއްވުމަށް ސަރުކާރުން ނަން ފޮނުވުމަކީ، ސަރުކާރުގެ ނުބައިކަން ހާމަވާ ހެއްްކެއް ކަމަށެވެ.

ފައްޔާޒު ވިދާޅުވީ ސަރުކާރުގެ އެ އަމަލަކީ ދިވެހި ރައްޔިތުންގެ މޫނުމަތީގައި ތަފާލެއް އެޅުން ކަމަށެވެ.