ޔޫއެފާ ޔޫރޮޕާ ލީގުގެ ކުއާޓާ ފައިނަލް ގުރުއަތު ނެގުން ހުކުރު ދުވަހު ބޭއްވިއިރު، މެޗުތައް ބެހިފައިވާ ގޮތުން، ޒަވީ އަލޮންސޯގެ ބެޔާން ލެވަކޫސެންއާއި، ކުޅުންތެރިއެއްގެ ގޮތުގައި އޭނާގެ ކެރިއަރުގެ މުހިންމު ޞަފުހާތަކެއް ލިޔުނު ލިވަޕޫލްގެ ކުރިމަތިލުމެއް ފެނުން ގާތެވެ.

ކުއާޓާ ފައިނަލްގެ ގުރުއަތުނެގުން ކުރިޔަށް ދިޔަގޮތަށް ބަލާލާއިރު، އިޓަލީގެ އޭސީ މިލާނާއި ހަމަ އެ ގައުމުގެ ރޯމާ ކުރިމަތިލާން ޖެހޭއިރު، އިނގިރޭސި ވިލާތުގެ ލިވަޕޫލް ބައްދަލު ކުރާނީ އިޓަލީގެ އެޓްލާންޓާއާއެވެ. ސެމީފައިނަލްގައި ބައްދަލުކުރާނީ މި މެޗުތަކުން މޮޅުވާ ދެ ޓީމެކެވެ. 

އަނެއްކޮޅުން ޖަރުމަނުގެ ބެޔާން ލެވަކޫސެން ނިކުންނާނީ އިނގިރޭސިވިލާތުގެ ވެސްޓް ހަމް ޔުނައިޓެޑާ ދެކޮޅަށެވެ. މިތަނުން މޮޅުވާ ޓީމެއް ސެމީ ފައިނަލްގައި ބައްދަލުކުރަން ޖެހޭނީ ފްރާންސްގެ މާސޭ އާއި ޕޯޗުގަލްގެ ބެންފީކާ ކުޅެގެން މޮޅުވާ ޓީމަކާއެވެ.

ޔޫރޮޕާ ލީގުގެ ކުއާޓާ ފައިނަލް މެޗުތައް ކުޅޭނީ އެޕްރީލް 12 އަދި 19 ގައެވެ. ސެމީ ފައިނަލް 3 މެއި ގައި ކުޅުމަށް ހަމަޖެހިފައިވާއިރު، މުބާރާތުގެ ފައިނަލް މެޗު ކުޅޭނީ 23 މެއިގައެވެ.