ދިވެހިރާއްޖޭގެ ސަރަހައްދު ދިވެހިން އަމިއްލައަށް ބެލެހެއްޓުމާއި މެދު އެހެން ބަޔަކު ކަންބޮޑުވާން ނުޖެހޭކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، މޯލްޑިވްސް ނޭޝަނަލް ޑިފެންސް ފޯސް (އެމް.އެން.ޑީ.އެފް) އެއަރ ކޯރ އިފުތިތާހުކޮށްދެއްވައި، އަންމޭންޑް އޭރިއަލް ވެހިކަލް (ޔޫ.އޭ.ވީ) ސިފައިންގެ ޚިދުމަތަށް ތަޢާރަފުކޮށްދެއްވުމަށް މިރޭ ނ. މާފަރު އިންޓަރނޭޝަނަލް އެއާޕޯޓުގައި ބޭއްވި ރަސްމިއްޔާތުގައި ދެއްކެވި ވާހަކަފުޅުގައެވެ.

މިރަސްމިއްޔާތުގައި ރައީސުލްޖުމްހޫރިއްޔާ ވިދާޅުވީ، ދިވެހިރާއްޖެއަކީ ކުޑަ ޤައުމެއް ނޫންކަމަށާއި، ދިވެހިރާއްޖެއަކީ ކުޑަ ޤައުމެއް ނޫންކަމަށާއި 9 ލައްކަ އަކަ ކިލޯމީޓަރުގެ ބޮޑު ޚާއްސަ އިޤުތިޞާދީ ސަރަހައްދެއް އޮތް ޤައުމެއް ކަމަށެވެ.

ރައީސުލްޖުމްހޫރިއްޔާ ވިދާޅުވީ، އެ ބޮޑު ސަރަހައްދަކީ ދަރިންނާއި ދަރިންގެ ދަރިންގެ މިހާރާއި މުސްތަގުބަލު އުޖާލާ ކުރުމަށްޓަކައި ލިބިފައިވާ ބޮޑު ނިއުމަތެއްކަމަށާއި އެ ބޮޑު ސަރަހައްދު ބެލެހެއްޓުމަކީ އަމިއްލައަށް ކުރާ ކަމަކަށްވާންޖެހޭނެ ކަމަށެވެ. ރައީސުލްޖުމްހޫރިއްޔާ ވިދާޅުވީ، ދިވެހިން ދިވެހިންގެ ސަރަހައްދު އަމިއްލައަށް ބެލެހެއްޓުމަކީ އެކަމާއި މެދު އެހެން ބަޔަކު ކަންބޮޑުވާން ޖެހޭ ކަމެއް ނޫންކަމަށާއި، އެހެން ބަޔަކު ކަންބޮޑުވާނަމަ އަދި އެއީ މާބޮޑު ކަންބޮޑުވުމެއް ކަމަށެވެ. މީގެ އިތުރުން ރައީސުލްޖުމްހޫރިއްޔާ ވިދާޅުވީ، ދިވެހިރާއްޖެއަކީ ކުޑަ ޤައުމެއް ކަމުގައި ދިވެހިން އަމިއްލައަށް ޤަބޫލު ކުރުމަކީ، ރަނގަޅު ގޮތެއް ނޫންކަމަށެވެ.

ރައީސުލްޖުމްހޫރިއްޔާގެ ވާހަކަފުޅުގައި އިތުރަށް ވިދާޅުވީ، ދިވެހި އަަސްކަރިއްޔާގެ ޤާބިލްކަން އިތުރު ކުރެއްވުމަށް މިދައުރުގެ ތެރޭގައި ގިނަ މަސައްކަތްތަކެއް ކުރައްވާނެ ކަމަށެވެ. އަދި ހުވާކުރެއްވުމުގެ ޖަލްސާގައި ވިދާޅުވި ފަދައިން ދިވެހިންގެ މިނިވަންކަމުގެ ރަތްރޮނގު ފަވާނީ ފަލަކޮށް ކަމަށާއި، ދިވެހިރާއްޖެއަކީ ހުރިހާ މާނައެއްގައިވެސް މިނިވަން ޤައުމަކަށް ވާނޭ ކަމަށެވެ.

ދިވެހިރާއްޖޭގެ ތާރީޚުގައި މުޅިން އަލަށް ވައިގެ ބާރެއް އުފައްދަވައި، އެ ބާރުގައި ޔޫ.އޭ.ވީ ބޭނުން ކުރަން ފެށުމަކީ، ދިވެހިރާއްޖޭގެ ޖުމްހޫރިއްޔާގެ މިނިވަންކަމާއި އިސްތިޤްލާލާއި، ސިޔާދަތު ޙިމާޔަތްކޮށް ދިފާޢުކުރުމަށް އެޅިގެންދާ ވަރަށް ހަރުދަނާ އަދި މުހިންމު ފިޔަވަޅެއްކަމުގައި ސަރުކާރުން ވަނީ ހާމަކޮށްފައެވެ. އަދި މި ޚިދުމަތުގެ ސަބަބުން، ރާއްޖޭގެ މަސްކަނޑުތަކުގެ ސަލާމަތާއި ރައްކާތެރިކަން ކަށަވަރު ކުރުމާއި، ރާއްޖޭގެ ސަރަޙައްދުގެ ތެރޭގައި ހިނގާފާނެ ޣައިރު ޤާނޫނީ އަމަލުތައް ހުއްޓުމަށްވެސް ވަރަށް ބޮޑު އެހީތެރިކަމެއް ލިބިގެންދާނެކަމުގައިވެސް ރައީސުލްޖުމްހޫރިއްޔާ ވަނީ ވިދާޅުވެފައެވެ.