ކަޅު ބާޒާރުގައި ފުޅާ ދާއިރާއެއްގައި ޑޮލަރުގެ ވިޔަފާރި ކުރަމުންގެންދާ ކަމުގެ މަޢުލޫމާތު ލިބިފައިވާތީ، ފުލުހުންގެ އެހީތެރިކަމާއެކު އިމިގްރޭޝަނުން ހިންގި ޚާއްސަ އޮޕަރޭޝަނެއްގައި، އިމިގްރޭޝަންގެ ބެލުމުގެ ދަށަށް ގެނެވުނު ބިދޭސީން ރާއްޖެ ނާދެވޭ ގޮތަށް ޑީޕޯރޓް ކުުރުމަށް ނިންމާފައިވާ ކަމުގައި، އިމިގްރޭޝަން ކޮންޓްރޯލަށް މުޙައްމަދު ޝަމްޢާާން ވަހީދު ވިދާޅުވެއްޖެއެވެ.

ޝަމްޢާން މިހެން ވިދާޅުވީ، އެކަމާއި ގުޅިގެން ކުރިމަތިވަމުން އަންނަ ސުވާލުތަަކަށް ޖަވާބު ދެއްވުމުގެ ގޮތުން އެކްސްގައި ލިޔުއްވި ޕޯސްޓެއްގައެވެ.

ކަޅު ބާޒާރުގައި ބޭރު ފައިސާގެ މުއާމަލާތް ކުރަމުން ދިޔަ 7 ބިދޭސީއަކު އިމިގްރޭޝަންގެ ބެލުމުގެ ދަށަށް ގެންގޮސްފައިވަނީ، މިމަހުގެ 9 ވަނަ ދުވަހުގައެވެ.

މިދިޔަ ހޮނިހިރު ދުވަހު ހިންގާފައިވާ މި އޮޕަރޭޝަނާ ގުޅޭގޮތުން އިމިގްރޭޝަނުން ހިއްސާކޮށްފައިވާ ގޮތުގައި، މި އޮޕަރޭޝަން ހިންގުމުގެ އެއް ސަބަބަކީ މި ބިދޭސީންގެ ގިނަ ޝަކުވާތަކެއް އެ މުއައްސަސާއަށް ލިބެމުން ދިއުމެވެ. އަދި އޮޕަރޭޝަންގެ ހިންގާފައިވަނީ މި ސަރަހައްދުގައި ހަރަކާތްތެރިވާ ބިދޭސީންގެ ހަރަކާތްތައް ދުރާލައި ދެނެގަތުމަށްފަހުކަމަށް އިމިގްރޭޝަނުން ހާމަކޮށްފައިވެއެވެ.

އެ އޮޕަރޭޝަންގައި އިމިގްރޭޝަނުގެ ބެލުމުގެ ދަށަށް ގެންދިޔަ 7 މީހުންނަކީ ވެސް ފުޅާ ދާއިރާއެއްގައި ގަވާއިދާ ހިލާފަށް ކަޅު ބާޒާރުގައި ޑޮލަރުގެ ވިޔަފާރި ކުރަމުން އަންނަ ބިދޭސީންކަމަށާއި، މީގެތެރޭގައި ޞައްޙަ ވީޒާއެއް ނެތި ރާއްޖޭގައި އުޅެމުން އަންނަ ބިދޭސީންނާއި، ދޫކޮށްފައިވާ ހުއްދައިގެ ބޭރުން މަސައްކަތްކުރާ ބިދޭސީން ހިމެނޭކަމަށް އިމިގްރޭޝަނުން ވަނީ ބުނެފައެވެ.