ޤައުމިއްޔަތުގެ ނަމުގައި އިންދަވަމުން ގެންދަވަނީ ނަފްރަތާއި، ރުޅިވެރިކަމާއި ފިތުނައިގެ އޮށެއް ކަމުގައި އެމްޑީޕީގެ ރައީސް ޢަބްދުﷲ ޝާހިދު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، މިސްރާބު ހަމަމަގަށް ކެމްޕޭންގެ ތެރެއިން، އެމްޑީޕީގެ ކެންޑިޑޭޓުންނަށް ތާއީދު ހޯއްދެވުމަށް ބޭއްވި ޖަގަހަ ޖަލްސާގައި ވާހަކަފުޅު ދައްކަވަމުންނެވެ.

އެމްޑީޕީގެ ރައީސް އަބުދުﷲ ޝާހިދު ވިދާޅުވީ، ރައިސުލްޖުމްހޫރިއްޔާގެ ކުރިފުޅުމަތީގައި މިސަރުކާރުގެ އިސްވެރިއަކުން އެހެން ވިދާޅުވުމަކީ، އެމަނިކުފާނަށް ސިހުން ލިބިވަޑައިގެންނެވި ކަމެއް ކަމަށެވެ.

Advertisement

އެވާހަކަފުޅުތަކަށް އިޝާރާތްކުރައްވައި ޢަބްދުﷲ ޝާހިދު ވިދާޅުވީ، އެއިންދަވަނީ ނަފްރަތާއި، ރުޅިވެރިކަމާއި ފިތުނައިގެ އޮށް ކަމަށެވެ. 

ޢަަބުދުﷲ ޝާހިދު ވިދާޅުވީ، މިހުރިހާ ދުވަހު، ދިވެހިރާއްޖެ ވުޖޫދު ވީއްސުރެ، ދިވެހިންނަށާއި ދިވެހި ދަރިންނަށް ވިސްނައިދެމުން ގެންދަވަނީ، ދިވެހިންނަކީ އެއް ނަސްލެއްގެ އެއްދީނެއްގެ ބައެއް ކަމަށެވެ.

ޝާހިދު ވިދާޅުވީ، ސަރުކާރާއި ދެކޮޅަށް ވާހަކަދައްކާ މީހުންނަކީ ދިވެހިން ނޫންކަމަށް ބުނެ އެދަމާލެވެނީ ރޮނގެއް ކަމަށާއި، އެފަދަ ފިތުނަވެރި ކަންކަމުގެ ނަތީޖާއެއްގެ ގޮތުން ދުނިޔޭގެ ޤައުމުތަކުގައި ބޮޑެތި ޤަތުލްޢާއްމުތައް ހިންގައި ހަލާކުވެފައި ހުރި ޤައުމުތައް ދުނިޔޭގައި އެބަހުރި ކަމަށެވެ.

އދ. ގެ އާއްމު މަޖިލީހުގެ ރައީސް ކަމުގެ މަޤާމުވެސް ފުރުއްވާފައިވާ، އެމްޑީޕީގެ ރައީސް ޢަބްދުﷲ ޝާހިދު ވިދާޅުވީ، އެފިތުނައިގެ އޮށަކީ، ޤައުމުތައް ހަލާކުވެގެން ދިޔުމުގެ އެންމެ ބޮޑު އަސްލު ކަމަށެވެ.

ޢަބްދުﷲ ޝާހިދު ވިދާޅުވީ ރާއްޖެ ބައިބައިކޮށްލައި ރާއްޖޭގެ ރައްޔިތުންގެ މެދުގައި ނަފްރަތު މަސައްކަތްތައް ހުއްޓަވާލެއްވުމަށް ރައީސުލްޖުމްހޫރިއްޔާއަށް ގޮވާލައްވާ ކަމަށެވެ.

މިސަރުކާރުން ލޯކަލް ގަވަރމެންޓް މިނިސްޓަރ އާދަމް ޝަރީފް އުމަރުވެސް ދާދިފަހުން ވަނީ، ރައީސުލްޖުމްހޫރިއްޔާ ބައިވެރިވެ ވަޑައިގެންނެވި ޖަލްސާއެއްގައި މަޖިލިސް މެމްބަރުންނަށް ޖިސްމާނީ އަނިޔާ ދިނުމަށް ހިއްވަރު ލިބޭ ގޮތަށް ވާހަކަފުޅު ދައްކަވާ ފައެވެ. އެހެން ނަމަވެސް ފަހުން އެމަނިކުފާނު ވިދާޅުވީ އެއީ މަޖާޒީ ގޮތެއްގައި ދެއްކެވި ވާހަކަފުޅެއް ކަމަށެވެ.