ވަޒީފާއިން ވަކިވުމަށްފަހު ޕެންޝަން ފައިސާ ނަގަން ބޭނުންވާ ފަރާތްތަކަށް އެކަމަށް ފުރުޞަތު ލިބޭނީ ޤާނޫނު އިސްލާޙް ކުރެވިގެން ކަމުގައި ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، ރައީސުލްޖުމްހޫރިއްޔާގެ އޮފީހުން ގެނެސްދޭ ރައީސްގެ ޖަވާބު ސިލްސިލާގައި މީހަކު ދެންނެވި ސުވާލަަކަށް ދެއްވި ޖަވާބުގައެވެ. އޭނާ ސުވާލުކޮށް އަދި ކަންބޮޑުވުން ފާޅުކޮށްފައި ވަނީ ވަޒީފާއިން ވަކިވާފަހުން، ވަރަށް ދަތި ހާލުގައި އުޅެން ޖެހުނު ނަމަވެސް ޕެންޝަން ފައިސާއިން ބޭނުން ނުކުރެވޭ މައްސަލައިގައެވެ.

ރައީސްގެ ވާހަކަފުޅުގައި ވިދާޅުވީ ޕެންޝަން ފައިސާ އަކީ ވަކި ޤާނޫނެއްގެ ދަށުން ނެގެމުން އަންނަ ފައިސާއެއް ކަމަށާއި، އެ ފަންޑު ބޮޑުކޮށް ހަރުދަނާ ކުރެއްވުމަކީ އެމަނިކުފާނުވެސް ބޭނުންފުޅުވާ ކަމެއް ކަމަށެވެ. އަދި ސުވާލުކުރި ފަރާތުން ފާޅުކުރެއްވި ކަންބޮޑުވުމާއި ގުޅޭ ގޮތުން ރައީސުލްޖުމްހޫރިއްޔާ ވިދާޅުވީ، ޕެންޝަންގެ ޤާނޫނަށް ބަދަލެ ގެނެވޭނީ ރައްޔިތުންގެ މަޖިލީހުގެ ތެރެއިން ކަމަށާއި، ޕެންޝަންގެ ޤާނޫނަށް ބަދަލެއް ނުގެނެސް އެފަދަ ކަމެއް ނުކުރެއްވޭނެ ކަމަށެވެ.

ޕެންޝަން ފަންޑަށް ޖަމާކުރާ ފައިސާ ލިބެން ފަށާނީ، ދިވެހިންގެ ތެރެއިން ވަޒީފާ އަދާކުރި ފަރާތުގެ އުމުރުން 65 އަހަރު ފުރުމަށް ފަހުގައެވެ. ބިދޭސީން ފަންޑަށް ޖަމާކުރި ފައިސާ އެމީހުން ވަޒީފާއިން ވަކިވެ އަނބުރާ ޤައުމަށް އެނބުރިދާއިރު ނެގޭނެއެވެ.