ފާއިތުވި ދެރޭގައި މާލޭގެ މަގުމަތީގައި ޤަވާއިދާއި ޚިލާފަށް ޕާކުކޮށްފައި އޮތް ހަތަރު ފުރޮޅުލީ 88 އުޅަނދެއް ފުލުހުން ޓޯވ ކޮށްފިއެވެ.

ފުލުހުންގެ އިދާރާއިން ވިދާޅުވި، ބުރާސްފަތި ދުވަހުގެ ރޭ އެކަނިވެސް 48 އުޅަނދު ޓޯވކޮށްފައިވާ ކަމަށެވެ. އަދި ބުދަދުވަހުގެ ރޭ ވެސް 40 އުޅަނދު ޓޯވކޮށްފައިވާ ކަމުގައި ފުލުހުންގެ އިދާރާއިން ވިދާޅުވިއެވެ.

ޕާކިން ސްޓިކާ ޖޫރިމަނާ ނުކުރި ނަމަވެސް، ޤަވާއިދާއި ޚިލާފަށް ޕާކުކޮށްގެން ޓޯވ ކުރާ އުޅަނދުތައް އަނބުރާ ދޫކުރާނީ، ޓޯކުރުމުގެ ސަބަބުން ދައްކަންޖެހޭ ފައިސާ ދެއްކުމުންކަމަށް މައުލޫމާތު ލިބިފައިއެވެ. 

ޕާކިން ސްޓިކާ ނުޖަހައި ހުއްޓާލުމާއި އެކު މާލެއާ ހުޅުމާލޭގެ ބައެއް ތަންތަނުގައި އެއްވެސް ގޮތަކަށް ބެލުމެއް ނެތި ހަތަރު ފުރޮޅުލީ އުޅަނދުތަކާއި ސައިކަލްތައްވެސް ދަނީ ޕާކު ކުރަމުންނެވެ. އަދި އެކަމުގެ ސަބަބުން އާއްމުންނަށް ދަތިތަކާއި ކުރިމަތިވެ އާއްމުންވެސް އަންނަނީ ކަންބޮޑުވުން ފާޅުކުރަމުންނެވެ.