ޔޫރޮޕާ ލީގުގެ ގަދަ-16 ގައި ޖަރުމަނުގެ ބެޔާން ލެވަކޫސެންއިން އަޒަރުބައިޖާންގެ ގަރުބަގު 3-2 އިން ބަލިކޮށް، މި ސީޒަނުގައި އެއްވެސް ޓީމެއްގެ އަތުން ބަލިނުވެ ދަމަހައްޓަމުން އަންނަ ރެކޯޑު އެ ޓީމުން ދަންމާލައިފިއެވެ.

ފުރަތަމަ ލެގުގައި މި ދެ ޓީމު ކުޅުނު މެޗު ވަނީ 2-2 އިން އެއްވަރުވެފައެވެ. އަދި ބުރާސްފަތި ދުވަހުގެރޭ ކުޅުނު ދެވަނަ ލެގުގައި ގަރުބަގުން ލެވަކޫސެން ސިއްސުވާލީ ދެވަނަ ހާފުގެ 8 މިނެޓު ތެރޭގައި، 59 އަދި 67 ވަނަ މިނެޓުގައި، ކާމިޔާބު ކުރި 2 ގޯލުންނެވެ. މީގެ އިތުރުން މެޗުގެ 62 ވަނަ މިނެޓުގައި ގަރުބަގުގެ ކުޅުންތެރިއަކަށް ވަނީ ރަތްކާޑެއް ވެސް ދައްކާފައެވެ.

ގަރުބަގުން ލީޑު ނެގިތާ 5 މިނެޓު ފަހުން ފްރިންޕޮންގެ ގޯލަކުން ލެވަކޫސަންއަށް ހިންހަމަޖެހުމެއް ލިބުނެވެ. ނަމަވެސް މެޗުގެ 90 މިނެޓު ހަމަވުމަށް ކައިރިވަމުން ދިޔަ ވަރަކަށް އެމީހުންގެ ނުތަނަވަސްކަން އިތުރުވެގެން ދިޔައެވެ. ސަބަބަކީ 2-1 ގެ ނަތީޖާއަކުން އެ ޓީމު ޔޫރޮޕާ ލީގުން އަލްވަދާއު ކިޔަން ޖެހޭނެތީއާއި، އެ ޓީމު މި ސީޒަނުގައި ބަލިނުވެ ދަމަހައްޓަމުން އަންނަ ރެކޯޑު ގެއްލޭނެތީއެވެ.

ލެވަކޫސެންގެ ނުތަނަވަސްކަން ފިލީ މެޗުގެ އިތުރު ވަގުތު ޕެޓްރިކް ޝިކް ކާމިޔާބުކުރި ދެ ގޯލުންނެވެ. މެޗުގެ 90+3 އަދި 90+8 ވަނަ މިނެޓުގައި ޝިކް ކާމިޔާބުކުރި ގޯލުތަކުން، 3-2 އިން މެޗު ކާމިޔާބުކޮށް، އެ ވަގުތު އެ ޓީމު ހާސިލްކުރަން ބޭނުންވި ހުރިހާކަމެއް ހާސިލް ކުރެވުނެވެ.

ލެވަކޫސެން މި ސީޒަންގައި 37 މެޗު ކުޅުނުއިރު އަދި މިހާތަނަށް އެއްވެސް މެޗަކުން ބަލިވެފައެއް ނުވެއެވެ. އަދި ޖަރުމަނު ލީގުގައި އެ ޓީމު އޮތީ 10 ޕޮއިންޓުގެ ލީޑެއްގައެވެ. ނަމަވެސް އެ ޓީމުގެ ތާރީހުގައި އަދި މިހާތަނަށް ލީގު ކާމިޔާބު ކުރެވިފައެއް ނުވެއެވެ. އެހެންކަމުން ސީޒަންގައި ބާކީ މިއޮތް ދުވަސްތަކަކީ އެ ޓީމުގެ ތާރީހާ ގުޅިފައި އޮތް ދުވަސްތަކެކެވެ.