"ބިންވެރިޔާ" އަދި "ގެދޮރުވެރިޔާ" ސްކީމްއާއި ގުޅިގެން ހުށަހާޅާ މައްސަލަތަކާއި އަދި ނިންމަންޖެހޭ ނިންމުންތައް ނިންމުމަށް، ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ލަފާފުޅުގެ މަތިން، ހައުސިންގ ކޮމިޓީއެއް އުފައްދައި އެކޮމިޓީގެ މަސައްކަތްތައް ފައްޓަވާފައިވާ ކަމުގައި، މިނިސްޓްރީ އޮފް ހައުސިންގ، ލޭންޑް އެންޑް އަރބަން ޑިވެލޮޕްމެންޓުން ވިދާޅުވެއްޖެއެވެ.

އެކޮމިޓީގެ ފުރަތަމަ ބައްދަލުވުން ބުރާސްފަތި ދުވަހުގެ ރޭގައި ބޭއްވި ކަމަށް ހައުސިން މިނިސްޓްރީން ހާމަކޮށްފައި ވީނަމަވެސް، އެކޮމިޓީގައި ހިމެނިވަޑައިގަންނަވާ ބޭފުޅުންނާއި އެބޭފުޅުންގެ ވަނަވަރެއް މިނިސްޓްރީން ހާމަކޮށްފައެއް ނުވެއެވެ. އަދި އެކޮމިޓީ އުފެއްދެވުމުގެ ބޭނުމާއި، އެކޮމިޓީގެ ޒިންމާ އާއި މަސްޢޫލިއްޔަތަކީ ކޮބައިކަމެއްވެސް އެމިނިސްޓްރީ ހާމައެއް ނުކުރައްވައެވެ.

"ގެދޮރުވެރިޔާ" ސްކީމްގެ ދަށުން ކުރީ ސަރުކާރުގައި ދޫކުރުމަށް ކަނޑައެޅި 4000 ފުލެޓް ލިބޭ މީހުންނަށް ފްލެޓްދީފައިވާ ގޮތް އެންޓިކަރަޕްޝަން ކޮމިޝަން އޭސީސީންވެސް ވަނީ ބަލާފައެވެ. އެކޮމިޝަނުން ހިންގި ތަޙްޤީޤަށްފަހުގައި ބުނެފައި ވަނީ، ގެދޮރުވެރިޔާ ސްކީމްގެ ތެރެއިން ފްލެޓް ލިބުނު %59 މީހުންގެ ޝަރުޠުތައް ފުރިހަމަ ނުވާ ކަމަށެވެ.