އެމްޑީޕީ ސަރުކާރުން ކުރިޔަށް ގެންދިޔަ ބިންވެރިޔާ ސްކީމްގެ ތެރެއިން ގޯތި ލިބިފައިވާ ފަރާތްތަކުގެ ތެރެއިން މިހާތަނަށް ގޯތީގެ ރެޖިސްޓްރީ އާއި ގޯތި ލިބުނު ކަމުގެ ލިޔުމާއި ހަވާލުވެފައި ނުވާ ފަރާތްތަކުން ރެޖިސްޓްރީ އާ ލިޔުމާއި ހަވާލުވުމަށް ހައުސިންގ މިނިސްޓްރީން މުހުލަތެއް ދެއްވައިފިއެވެ.

ހައުސިން މިނިސްޓްރީން ނެރުނު ނޫސް ބަޔާނެއްގައި ވިދާޅުވެފައި ވަނީ، ބިންވެރިޔާ ސްކީމުން ގޯތި ލިބި އެއްބަސްވުންތަކުގައި ސޮއިނުކުރާ މީހުންނަށާއި އަދި ގޯތީގެ ރަޖިސްޓްރީއާ ގޯތި ލިބުނު ކަމުގެ ލިޔުމާއި ހަވާލު ނުވެ ތިބި މީހުންނަށް، އެކަންކަން ނިންމުމަށް އެޕޮއިންޓްމެންޓްތައް ހެއްދުމަށް، 27 މާރިޗު 2024 ވަނަ ދުވަހުގެ ރޭގެ 23:59 އާއި ހަމައަށް މުއްދަތު ދީފައިވާ ކަމަށެވެ. އެހެންކަމުން މިމަހުގެ 16ވާ ހޮނިހިރު ދުވަހުން ފެށިގެން،  މިމަހުގެ 27ވާ ބުދަ ދުވަހުގެ 23:59ގެ ކުރިން އެގްރިމެންޓްތަކުގައި ސޮއެ ކުރުމަށާއި، ގޯތި ލިބުނު ކަމުގެ ލިޔުމާއި ރެޖިސްޓްރީއާ ހަވާލުވުމަށް، ހިޔާވަހި ޕޯޓަލް މެދުވެރިކޮށް އެޕޮއިންޓްމެންޓް ހެއްދުމަށް އެދޭ ކަމަށެވެ. 

އެހެން ނަމަވެސް އެމުއްދަތުގެ ތެރޭގައި އެޕޮއިންޓްމަންޓް ނުނަގާ މީހުންގެ ގޯތިތަަކަށް ވާނޭ ގޮތާއި ގުޅޭ ގޮތުން އެމިނިސްޓްރީގެ ބަޔާނުގައި އެއްވެސް އެއްޗެއް ވިދާޅުވެފައެއް ނުވެއެވެ. އެމިނިސްޓްރީން ވިދާޅުވީ، މިހާތަނަށް، ބިންވެރިޔާ ސްކީމްގެ ދަށުން ގޯތި ލިބިފައިވާ މީހުންގެ ތެރެއިން، 8394 މީހުންނާއިއެކު އެއްބަސްވުމުގައި ސޮއެކޮށް، އެމީހުންނަށް ގޯތި ލިބުނު ކަމުގެ ލިޔުމާއި ގޯތީގެ ރެޖިސްޓްރީ ހަވާލުކުރެވިފައިވާ ކަމަށެވެ.

ބިންވެރިޔާ ސްކީމްގެ ދަށުން ގޯތި ދެއްވާފައި ވަނީ، ހުޅުމާލެ ފޭސް 2 އަދި 3 އިންނާއި، ގުޅީފަޅާއި ގިރާވަރު ފަޅުންނެވެ.