ރައްޔިތުންގެ މަޖިލިސް އިންތިޚާބުގައި ވޯޓު ދިނުމަށް ރީ ރެޖިސްޓްރީ ކުރުމުގެ ފުރުޞަތު މާދަމާ ހަމަވާއިރު، ބުރާސްފަތި ދުވަހުގެ މެންދުރާއި ހަމައަށް، ރާއްޖެއިން ބޭރުގައި ވޯޓުލުމަށް ހާހެއްހައި މީހުން ރެޖިސްޓްރީކޮށްފައިވާ ކަމުގައި އިލެކްޝަންސް ކޮމިޝަނުން ވިދާޅުވެއްޖެއެވެ.

އެކޮމިޝަނުން ވިދާޅުވީ، ރާއްޖެއިން ބޭރުގައި ބެހެއްޓުމަށް ކަނޑައަޅާފައިވާ ފޮށިތަކުގެ ތެރެއިން 6 ފޮއްޓަކަށް ވޯޓުލުމަށްޓަކައި މިހާތަނަށް 827 މީހުން ރީރެޖިސްޓްރީކޮށްފައިވާ ކަމަށެވެ.

އޭގެ ތެރެއިން އެންމެ ގިނަ މީހުން ރީރެޖިސްޓްރީ ކޮށްފައި ވަނީ މެލޭޝިޔާގެ ކުއާލަލަމްޕޫރްގައި ބަހައްޓާ ވޯޓުފޮއްޓަށެވެ. ދެވަނަ އަށް އެންމެ ގިނަ މީހުން ރީރެޖިސްޓްރީކޮށްފައި ވަނީ ސްރީލަންކާގެ ކޮލަމްބޯއަށެވެ.

ރީރެޖިސްޓްރީކޮށްފައިވާ ފޮށިތަކައި އަދަދުތައް؛

މެލޭޝިއާގެ ކުއާލަލަމްޕޫރް - 463

ސްރީލަންކާގެ ކޮލަމްބޯ - 241

އިނގިރޭސި ވިލާތުގެ ލަންޑަން - 52

އިންޑިއާގެ ޓްރެވިންޑްރަމް - 50

އެކުވެރި ޢަރަބި އިމާރާތުގެ އަބޫދާބީ - 14

ތައިލެންޑްގެ ބެންކޮކް - 10

މިހާރު ހަމަޖެހިފައިވާ ގޮތުން ރައްޔިތުންގެ މަޖިލީހުގެ އިންތިޚާބު އޮންނާނީ 21 އޭޕްރީލްވާ އާދީއްތަ ދުވަހުގައެވެ. ރާއްޖޭގެ އިންތިޚާބުތައް ރާއްޖެއިން ބޭރުގައި ބޭއްވެމުން އަންނަ ވަގުތުތަކަށް ބަލާއިރު، އެންމެ ފަހުން ވޯޓުލާން ފަށައި އަދި އެންމެ ފަހުން ބަންދުކުރާނީވެސް އިނގިރޭސި ވިލާތުގެ ލަންޑަންގައި ބެހެއްޓޭ ވޯޓުފޮއްޓަށެވެ.

  ވޯޓުލާން ރަޖިސްޓަރީވެފައިވާ ރަށް ނޫން އެހެން ތަނެއްގައި ވޯޓުލުމަށްޓަކައި ރަޖިސްޓަރީވުމުގެ ފުރުޞަތު 2024 މާރިޗު 16 ވާ ހޮނިހިރު ދުވަހުގެ 15:00 ގެ ނިޔަލަށް ހަމަވާނެއެވެ.