ދެވަނަ ފަރާތެއް ބައިވެރިނުކޮށް ސިޓީ ކައުންސިލުުން ދޭ ޚިދުމަތެއްގެ ގޮތުގައި ވިލިމާލޭގައި އަލުން ބަގީގެ ޚިދުމަތް ދިނުމަށް މާލޭ ސިޓީ ކައުންސިލުން ނިންމައިފިއެވެ.

އެޚިދުމަތް ކައުސިލުން ދޭ ގޮތަށް ހަމަޖެއްސުމަށް މިއަދު ބޭއްވި މާލޭ ސިޓީ ކައުންސިލްގެ 4 ވަނަ ދައުރުގެ 138 ވަނަ ރަސްމީ އާއްމު ޖަލްސާގައި ވަނީ ފާސްކޮށްފައެވެ.

މިޖަލްސާގައި އެގޮތަށް ފާސްކޮށްފައި ވަނީ ކައުންސިލް މެމްބަރުންގެ އިއްތިފާޤުންނެވެ.

ކުރީގެ މޭޔަރުގެ ދުވަސްވަރުގައި، ވިލިމާލޭގައި ބަގީގެ ޚިދުމަތް ދިނުމަށް، ޕިންކް ސްކައި މޯލްޑިވުސް ނަމަކަށް ކިޔާ ކުންފުންޏަކާއި ހަވާލުކުރިއެވެ. އެހެންނަމަވެސް އެކުންފުންޏަށް އެޚިދުމަތް ދެވޭ ގޮތެއް ނުވިއެވެ. 

މީގެ އިތުރުން މާލޭގެ މޭޔަރަކަށް މިހާރުގެ ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒު ހުންނެވި އިރު، ސިޓީ ކައުންސިލުން ބަގީގެ ޚިދުމަތް ދިނުމަށްޓަކައި 10 ބަގީ އެއް ގެނައެވެ. އެހެން ނަމަވެސް އޭގެ ތެރެއިން ގިނަ ބަގީތައް މިހާރު ހުރީ ހަލާކުވެފައެވެ.

މިއަދުގެ ޖަލްސާގައި އާޒިމް ވިދާޅުވީ ބަގީގެ ޚިދުމަތް އަލުން ފެށުމަށް ދެ ބަގީއެއް މަރާމާތުކޮށްފައި ވީ ނަމަވެސް އެބަގީތަކުގެ ހާލަތުވެސް ދަށް ކަމަށެވެ.

މީގެ އިތުރުން ބަޔަކާއި ހަވާލުކޮށްގެން ބަގީގެ ޚިދުމަތް ދިނުމަށްވުރެ ސިޓީ ކައުންސިލުން އެޚިދުމަތް ދިނުން ޚަރަދު ކުޑަކަންވެސް އާޒިމް ވަނީ ފާހަގަކުރައްވާފައެވެ.