ބިސްވިއްކުމާއި ގެންގުޅުމާއި އަދި ރައްކާކުރުމުގައި އަމަލު ކުރެވޭ ގޮތުގެ ސަބަބުން ކާބޯތަކެތީގެ ރައްކާތެރިކަން ގެއްލުމުގެ ފުރުޞަތު ވަރަށް ބޮޑުވެގެންދާތީ، ބިހުގެ ބޭރު ތޮށީގައި ނަޖިސް ހަރުލާފައި ނުވަތަ ހަޑިވެފައި ހުންނަ ބިސް ނުގަތުމަށް ސަމާލުކަން ދިނުމަށް މޯލްޑިވްސް ފުޑް އެންޑް ޑްރަގް އޮތޯރިޓީ އެދިއްޖެއެވެ.

އެމްއެފްޑީއޭއިން މިއަދު ނެރުނު ނޫސްބަޔާނުގައި ބުނެފައި ވަނީ، ބިސް ދޮވެގެން ބޭނުން ކުރުމަކީވެސް އެންމެ ރައްކާތެރި ގޮތް ނޫންކަމަށާއި، ބިސް ދޮވުމުގެ ސަބަބުން ބިހުގެ ތެރެއަށް ޖަރާސީމާއި ކެމިކަލް ވާޞިލްވުމަށް މަގުފަހި ވެގެންދާ ކަމަށެވެ.

އެހެންވެ ބިސް ގަތުމާއި ބޭނުން ކުރުމާއި ރައްކާކޮށް ބެހެއްޓުމުގައި އަމަލު ކުރަންވީ ގޮތުގެ އިރުޝާދުތައް އެމްއެފްޑީއޭގެ ނޫސް ބަޔާނުގައި ވަނީ ހިމަނާފައެވެ.

މިގޮތުން؛

- ނަޖިސް ހަރުލާފައި ނުވަތަ ބިހުގެ ތޮށި ހަޑިވެފައި ހުންނަ ބިސް ނުގަތުން.

- ފިނިކޮށް (އައިސް އަލަމާރީގައި) ބަހައްޓާފައި ހުންނަ ބިސްގަތުމަށް އިސްކަންދިނުން.

- ބިހުގެ މުއްދަތު ހަމަވާ ތާރީޚް ބެލުން. އަދި މުއްދަތު ހަމަވެފައި ހުންނަ ބިސް ބޭނުން ނުކުރުން.

- ރެނދުލާފައި ހުންނަ ބިސް ނުގަތުން.

- ބިސް ދޮވެގެން ބޭނުން ނުކުރުން.

- ބޭނުންވާ މިންވަރަށް ވުރެ އިތުރަށް ބިސް ނުގަތުން.

- އެހެން ކާބޯތަކެއްޗާއި ތަޣައްޔަރު ނުވާނެހެން އައިސް އަލަމާރީގައި ބިސް ރައްކާކުރުން.

- ރޯ ނުފިލުވައި ހުންނަ ބިސް ބޭނުންކޮށްގެން ތައްޔާރުކުރާ ކާބޯތަކެތި ބަހައްޓަންޖެހޭ ފިނިހޫނު މިނުގައި ބެހެއްޓުމާއި އަދި އެފަދަ ތަކެތި އައިސް އަލަމާރިން ބޭރުގައި 02 ގަޑިއިރަށް ވުރެ ގިނަ އިރު ނުބެހެއްޓުން.

އެމްއެފްޑީއޭއިން މި އިރުޝާދުތައް ދިން އިރު މާލެ ސަރަހައްދުގެ ބައެއް ސުޕަރމާޓުތަކުގައި ވިއްކާ ކުކުޅުބިހުގައި ނަޖިސް ހޭކި ބޭރު ތޮށިގަނޑު ވަަރަށް ބޮޑަށް ހަޑިވެފައި ހުންނަކަން ވަނީ ފާހަގަ ކުރެވިފައެވެ.