ވޮލިބޯލް އެސޯސިއޭޝަން އޮފް ދަ މޯލްޑިވްސް (ވީއޭއެމް) އިން، އެ އެސޯސިއޭޝަންގެ އެކްސްޓްރާ އޯޑިނަރީ ކޮންގްރެސްއެއް މި ހަފްތާގެ ހޯމަ ދުވަހު ބާއްވައި، އެ ކޮންގްރެސްގައި ކަންތައްތަކެއް ނިންމި ނަމަވެސް އެ ނިންމުންތައް ބަލައި ނުގަންނަކަމުގައި، ކޮނިޝަނަރ އޮފް ސްޕޯޓްސް، މުޙައްމަދު ޠަލާލު ވިދާޅުވެއްޖެއެވެ. ޠަލާލުގެ މި ނިންމުން އިއްޔެ އެ އެސޯސިއޭޝަނަށް އަންގާފައިވާކަމަށް މި ނޫހަށް ވަނީ މައުލޫމާތު ލިބިފައެވެ.

ވީއޭއެމްގެ ހިންގާ ކޮމެޓީ އެކުލަވާލުމަށް ބާއްވާ އިންތިހާބު އޮންނާނެ ތާރީހަކަށް މި މަހުގެ 15 ވަނަ ދުވަސް ކަނޑައަޅާފައިވަނިކޮށް، ޠަލާލު ވަނީ އެ އިންތިހާބު މަޑުޖައްސާލުމަށް އަންގާފައެވެ. ނަމަވެސް އެސޯސިއޭޝަނުން މިކަމަށް އިޖާބަ ނުދީ، އިންތިހާބުގައި ވާދަކުރައްވާ ފަރާތްތަކުގެ ނަންތައް ވެސް ވަނީ އިއުލާންކޮށްފައެވެ. އަދި އޭގެ އިތުރުން މިދިޔަ ހޯމަ ދުވަހު މިވަނީ އެކްސްޓްރާ އޯޑިނަރީ ކޮންގްރެސް ވެސް ބާއްވާފައެވެ.

ހޯމަ ދުވަހު އޮތް ވީއޭއެމްގެ ކޮންގްރެސްގައި ނިންމާފައިވާ މުހިންމު ކަންތައްތަކުހެ ތެރޭގައި ހިމެނޭ ބައެއް ކަންކަން:

1.       މާޗު 19 ވަނަ ދުވަހަށް އިންތިހާބު ފަސްކުރުން

2.       އެސޯސިއޭޝަންގެ ހިންގުން، އިންތިހާބަކާ ހަމައަށް ދަންދެން، ބީޗް ވޮލީބޯލް ކޮމިޝަންގެ ޗެއާމަން ކަމުން، އާ އަސާސީ ގަވާއިދުގެ ތެރެއިން، ބީޗްވޮލީބޯޅަ ނައިބު ރައީސަކަށް ބަދަލުވި، އަބްދުﷲ ނަޝީދު (އަބުޅޯ)އާ ހަވާލުކުރުން

3.       ވޮލީ އެސޯސިއޭޝަންގެ އިލެކްޓޯރަލް ކޮމިޓީ އާއި ލީގަލް ކޮމިޝަން އަދި އެޕީލްސް ކޮމިޝަން ފާސްކުރުން

ވީއޭއެމްގެ އިންތިހާބު ފަސްކުރުމަށް ޠަލާލު އެންގެވި ސަބަބުތަކުގެ ތެރޭގައި، 2020 ވަނަ އަހަރުން ފެށިގެން 2023 ވަނަ އަހަރާ ހަމައަށް އޮޑިޓް ރިޕޯޓު ހުށަހަޅާފައި ނުވުމާއި ވީއޭއެމް އާއި ގުޅޭ ގިނަ ޝަކުވާތަކެއް ކޮމިޝަނާ އޮފް ސްޕޯޓްސް އޮފީހަށް ލިބިފައިވުން ހިމެނެއެވެ.