ކުޑަ ކަމަކުން ވެސް ގިނަ ދަރުމަ ހޯދިދާނެއެވެ.

ދެވަނަ އެޕިސޯޑުގައި ޝެއިޙް އިލްޔާސް ޖަމާލް އަލިއަޅުވާލެއްވީ އިމާމު މީހާއާ އެއްވަރަށް އާމީން ކިޔުމާ ގުޅޭގޮތުންނެވެ.

ކީރިތި ރަސޫލާ ޙަދީޘްކުރެއްވި: ( إِذَا أمَّنَ الإمَامُ، فأمِّنُوا، فإنَّه مَن وافَقَ تَأْمِينُهُ تَأْمِينَ المَلَائِكَةِ غُفِرَ له ما تَقَدَّمَ مِن ذَنْبِهِ) صحيح البخاري މާނައީ: "އިމާމު މީހާ އާމީން ކިޔަން ފެށުމުން ތިޔަބައިމީހުން އާމީންކިޔާށެވެ! ފަހެ ހަމަކަށަވަރުން އެމީހެއްގެ އާމީން ކިޔުމާއި މަލާއިކަތުންގެ އާމީން ކިޔުމާ ދިމާވެއްޖެނަމަ، އެމީހެއްގެ އިސްވެދިޔަ ފާފަތައް ފުހެވޭހުއްޓެވެ."

ލޮބުވެތި މުސްލިމް އަޚުންނާ އުޚްތުން! ނިކަން ވިސްނަވާ! ނަމާދުގައި އިމާމާއެކު އާމީން ކިޔުމަކީ މާ ބޮޑުކަމެއް ނޫން. އަދި އެހާ ގިނަ ވަގުތު ހޭދަވާކަމެއް ވެސް ނޫން. ނަމަވެސް ބައެއް މީހުން މިކަމުގައި ފަރުވާކުޑަކުރޭ. ބައެއް މީހުން އިމާމާގެ ކުރިން އާމީން ކިޔަން ފަށާ. އަނެއްބައި މީހުން އިމާމާ އާމީން ކިޔައި ނިމުމުން ވެސް އާމީން ކިޔަން ފަށާ. ނަމަވެސް މާތް ނަބިއްޔާ އަމުރުކުރެއްވީ އިމާމު މީހާ އާމީން ކިޔަން ފެށުމާއެކު އާމީން ކިޔުމަށް. އެވަގުތުގައި މަލާއިކަތުން އާމީން ކިޔުއްވާނެ. އެ ބޭކަލުންނާ އެއްވަރަކަށް އާމީން ކިޔިއްޖެނަމަ، އެމީހެއްގެ އިސްވެދިޔަ ފާފަތައް ފުހެވޭނެ. ބައްލަވާ! ކުޑަ ކަމަކުން ކުޑަ ހިނދުކޮޅެއްގެ ތެރޭގައި ޙާޞިލްވެގެން އެދަނީ ވަރަށް ބޮޑު ކަމެއް. އެހެންކަމުން މިކަމުގައި ފަރުވާކުޑަ ނުކުރައްވަމާތޯ!