އެކާވީސް އަހަރަށްފަހު، އިލެކްޝަންސް ކޮމިޝަނުން އިސްމާޢީލް ޙަބީބު ވަކިވެވަޑައިގެންނެވި އިރު، އިލެކްޝަންސް ކޮމިޝަނަށް ޚިދުމަތް ކުރެއްވުމުގައި ޙަޔާތުން ގިނަ ވަގުތުތަކެއް އެމަނިކުފާނު ވަނީ ޤުރުބާން ކުރައްވާފައެވެ. ރާއްޖޭގެ ސިޔާސީ މަޝްރަޙަށް އެންމެ ބޮޑެތި ބަދަލުތައް އަންނަމުން ދިޔައިރު، އިލެކްޝަންސް ކޮމިޝަންގައި ޙަބީބު ކުރެއްވި ޚިދުމަތްތަކަކީ ފާހަގަކޮށްލެވޭ ޚިދުމަތްތަކެކެވެ. މިގޮތުން 2003 ވަނަ އަހަރުން ފެށިގެން  ބޭވުނު މަޖިލިސް އިންތިޚާބުތަކާއި ރިޔާސީ އިންތިޚާބުތަކާއި، ލޯކަލް ކައުންސިލް އިންތިޚާބުތަކާއި، ނިޒާމީ ވޯޓުގައިވެސް ޙަބީބު މުހިއްމު ގިނަ މަސައްކަތްތަކެއް ކުރެއްވިއެވެ.

މީގެ އިތުރުން ޙަބީބަކީ، އޭގެ ކުރިން ޖަމާޢަތުގެ ތަޢުލީމާއި، ނުރަސްމީ ތަޢުލީމު ދިނުމުގައި އަދި ރާއްޖޭގެ ނޫސްވެރިކަމުގައިވެސް ވަރަށް މުޙިއްމު ދައުރެއް އަދާކުރެއްވި ބޭފުޅެކެވެ. އެކަމުގެ ނަތީޖާއަކީ، ކޮމިޝަނުގައި ޙަބީބު ހުންނެވި ދުވަސްތަކުގައި ރާއްޖޭގެ މީޑިއާތަކާއި ބޭއްވި ގާތްގުޅުމާއި ނޫސްވެރިންނާއި ބޭއްވި ގާތްގުޅުމެވެ.

2003 ވަނަ އަހަރުން ފެށިގެން 2007 ވަނަ އަހަރަށް އިންތިޚާބާއި ބެހޭ މަސައްކަތްތަކުގައި ޙަބީބު މަސައްކަތް ކުރެއްވި އިރު، ކޮމިޝަންގެ ދާއިމީ ވަޒީފާއާ ޙަބީބު ގުޅިވަޑައިގެންނެވީ، 15 އޮގަސްޓް 2007 ގައެވެ. އަދި ކޮމިޝަންގެ މެމްބަރަކަށް ވެވަޑައިގެންނެވީ، 13 މާރިޗް 2014 ގައެވެ. ކޮމިޝަންގެ ނައިބު ރައީސް ކަމުގެ މަޤާމަށް ވަޑައިގެންނެވީ، 25 ޖެނުއަރީ 2021 ގައެވެ.

Advertisement

21 އަހަރަށް ފަހު، މިއަދުން ފެށިގެން ޙަބީބު ޚިދުމަތުން ވަކިވެ ވަޑައިގެންނެވި އިރު، ނޫން.އެމްވީ ގެ "ކޮފީ ވިތު ސުލައިމާން" ޕްރޮގްރާމްގައި ވާހަކަފުޅު ދައްކަވަމުން ޙަބީބު ވިދާޅުވީ ދެން ކުރައްވާނީ ކޮންކަމެއްކަން އަދި ކަނޑައަޅުއްވާފައި ނުވާ ކަމަށެވެ.

އެހެން ނަމަވެސް ރާއްޖޭގެ އިންތިޚާބުތައް ބޭއްވުނު ގޮތުގެ މައުލޫމާތު ފޮތެއްގެ ސިފައިގައި ނެރުއްވުމަކީ ކުރައްވަން އެންމެ ބޭނުންފުޅުވާ ކަންތައް ކަމުގައި ފާހަގަކުރައްވަމުން ޙަބީބު ވިދާޅުވީ، އެއީ ފައްޓަވާފައި އަދި ނުނިމި އޮތް މަސައްކަތެއް ކަމަށާއި އެހެން ކަމުން އެމަސައްކަތް ނިންމަވާލެއްވުމަކީ އެންމެ ބޭނުންފުޅުވާ ކަންތައް ކަމުގައެވެ. އަދި ޔުނިވަސިޓީގައި މަތީ ތަޢުލީމު ޙާސިލްކުރެއްވި އިރު މުޙައްމަދު އަމީނުގެ ޒަމާނުން ފެށިގެން ދިވެހިރާއްޖޭގައި އިންތިޚާބުތައް ބޭއްވިފައިވާ ގޮތާއި ގުޅޭ ގޮތުން މަޢުލޫމާތު އެއްކުރެއްވި ކަމުގައި ޙަބީބު ވިދާޅުވިއެވެ.

ޙަބީބު ވިދާޅުވީ، މާސްޓަރސް ޑިގްރީއަށް ކިޔަވާ ވިދާޅުވި އިރު، ތީސީސް ލިޔުއްވުމަށް އެންމެ ފުރަތަމަ ނެންގެވި މައުލޫއަކީ ރާއްޖޭގައި އިންތިޚާބުތައް ބޭއްވެމުން އައި ގޮތް ނަމަވެސް އެމައުލޫއަށް ތީސީސް ލިޔުއްވުމަށް ހުށައެޅުއްވި ހުށައެޅުން ފާސްނުވީ ކަމަށެވެ.

ޙަބީބު ވިދާޅުވީ އެއީ އެމަނިކުފާނު ކުރައްވަން ޖެހޭ ކަމެއް ކަމުގައި ދެކެވަޑައިގަންނަވާތީ، ކޮމިޝަނުން ވަކިވެވަޑައިގެންނެވުމަށްފަހުގައި އެމަސައްކަތާއިގެން ކުރިޔަށް ވަޑައިގެންނެވުމުގެ ވިސްނުންފުޅު ހުރި ކަމަށެވެ.

އެމަސައްކަތް ކުރެއްވުމުގެ މުހިއްމު ކަން ފާހަގަކުރައްވަމުން، ޙަބީބު ދެއްކެވި ވާހަކަފުޅުގައި 2003 ވަނަ އަހަރު ސެޕްޓެމްބަރު މަހު މާލޭގައި ހިނގައި ދިޔަ ހަމަނުޖެހުންތަކުގެ ތެރޭގައި އިލެކްޝަންސް ކޮމިޝަންގައި ރޯކޮށްލުމުން އެކޮމިޝަންގެ ވަރަށް ގިނަ ތާރީޚީ އަދި މުހިއްމު ލިޔެކިޔުންތަކެއް އަނދައިގެން ދިޔަކަން ފާހަގަކުރެއްވިއެވެ. އަދި އެކަމުގެ ސަބަބުން އިންތިޚާބުތަކާއި ބެހޭ މުހިއްމު ގިނަ ލިޔެކިޔުންތަކެއް އަނބުރާ ލިބެން ނެތް ގޮތެއްގައި އަބަދަށް ގެއްލިގެން ދިޔަކަންވެސް ޙަބީބު ފާހަގަކުރެއްވިއެވެ.

އިލެކްޝަންސް ކޮމިޝަންގެ ޚިދުމަތުން ޙަބީބު ދެ ދައުރު ފުރިހަމަ ކުރައްވައި ވަކިވެ ވަޑައިގެންނެވި އިރު، ޙަބީބު ކޮމިޝަނުގައި ކުރެއްވި މަސައްކަތްތައް އާއްމުންނާއި ކަމުވޮށިގެންވާ ބޭފުޅުން ވަނީ ބަލައިގެންފައެވެ.