މި ރޯދަމަހު ސަރުކާރުން ކޮންމެ ގޭބިސީއަކަށް ހިލޭ ބެހުމަށް ނިންމާފައިވާ ހަނޑުލާއި ފުށް މިހާތަނަށް 5000 ވުރެ ގިނަ މީހުންނަށް ދޫކުރެވިފައިވާ ކަމުގައި މާލޭ ސިޓީ ކައުންސިލުން ބުނެފިއެވެ.

މާލޭ ސިޓީ ކައުންސިލުން ހާމަކޮށްފައިވާ ގޮތުގައި އިއްޔެއާއި ހަމައަށް 5301 މީހަކަށް ވަނީ ހަނޑުލާއި ފުށް ހަވާލުކޮށްފައެވެ.

ސަރުކާރުން ދޫކުރާ ހަނޑޫ އަދި ފުށް މާލެ ސަރަހައްދުގެ ގޭބިސީތަކަށް ދޫކުރަން ފަށާފައި ވަނީ، ހޮނިހިރު ދުވަހުން ފެށިގެންނެވެ.

މާލެ ސަރަހައްދުގައި، ހަނޑޫ އަދި ފުށް ބަހަމުން ދަނީ، ސޯޝަލް ސެންޓަރުންނާއި، ގަލޮޅު ދަޑުންނާއި، މާލޭ ސިޓީ ކައުންސިލްގެ އާއްމު ޚިދުމަތްތަކާއި ބެހޭ ބައިންނާއި، ވިލިމާލޭ މަސްޖިދުލް ބިއްރީގަޔާއި، ހުޅުމާލެ ފޭސް 1 ގައި ހުންނަ އުމަރު ޒާހިރު ބިލްޑިންގ އިންނާއި، ހުޅުމާލެ ފޭސް 2 ގެ ވިނަރެސް 10 ވަނަ ޓަވަރުންނެވެ.

ރޯދައަށް ސަރުކާރުން ކޮންމެ ގޭބިސީއަކަށް ހިލޭ ދިނުމަށް ނިންމާފައި ވަނީ 10 ކިލޯ ހަނޑުލާއި، 10 ކިލޯ ފުށެވެ. މިރޯދަމަހު ކާޑު ދޫކުރުން ކުރިޔަށް ގެންދިޔުމަށް ހަމަޖައްސާފައި ވަނީ ރޭގަނޑު 9:00 އިން 12:00އަށެވެ.

މާލޭގައި ގޭބިސީތަކަށް ކާޑު ދޫކުރަން ފެށި ނަމަވެސް އަތޮޅުތަކުގެ ބައެއް ރަށްރަށަށް ކާޑެއް ނުލިބެއެވެ.