އިލެކްޝަންސް ކޮމިޝަންގައި ޙަބީބު މެމްބަރު ކަމުގެ ދެދައުރު ފުރިހަމަ ކުރައްވައި ކޮމިޝަނުން ޙަބީބު ވަކިވެވަޑައިގެންފިއެވެ.

ޙަބީބު ވަނީ ކޮމިޝަންގެ މަސައްކަތުގައި ވިދިވިދިގެން 2 ދައުރު ފުރިހަމަ ކުރައްވާފައެވެ. އިލެކްޝަންސް ކޮމިޝަންގެ މެމްބަރެއްގެ ގޮތުގައި މަސައްކަތް ކުރެއްވުމުގެ އިތުރުންވެސް އެކޮމިޝަނުގައި މަސައްކަތް ކުރެއްވި އިތުރު 11 އަހަރާއި އެކު ޖުމުލަ 21 އަހަރު ޙަބީބު އިލެކްޝަންސް ކޮމިޝަނުގައި މަސައްކަތް ކުރެއްވިއެވެ.

މިގޮތުން ޙަބީބު އިލެކްޝަންސްގައި މަސައްކަތް ކުރައްވަން ފައްޓަވާފައި ވަނީ، 2003 ވަނަ އަހަރުން ފެށިގެންނެވެ. އޭރު ޙަބީބު މަސައްކަތް ކުރައްވަމުން ގެންދެވީ މިނިސްޓްރީ އޮފް އެޑިޔުކޭޝަންގައެވެ.

އިލެކްޝަންސް ކޮމިޝަންގެ ދާއިމީ ވަޒީފާއާ ޙަބީބު ގުޅިވަޑައިގެންނެވީ، އެގްޒެކްޓިވް ޑިރެކްޓަރުގެ މަޤާމަށެވެ. މީގެ އިތުރުން އެކޮމިޝަންގެ ޑިރެކްޓަރުގެ މަޤާމާއި، ޑެޕިއުޓީ ޑައިރެކްޓަރ ޖެނެރަލްގެ މަޤާމް ފުރުއްވާފައިވެއެވެ. އެންމެ ފުރަތަމަ އިލެކްޝަންސް ކޮމިޝަންގެ މެމްބަރު ކަމުގެ މަޤާމަށް ޙަބީބު ޢައްޔަނު ކުރައްވާފައި ވަނީ، 13 މާރިޗު 2014 ގައެެވެ. ކޮމިޝަންގެ ނައިބު ރައީސް ކަމުގެ މަޤާމުގައި 3 އަހަރު ޙަބީބު ހޭދަކުރައްވާފައިވެއެވެ.

އިލެކްޝަންސް ކޮމިޝަންގެ މެމްބަރު އިސްމާޢީލް ޙަބީބު ކޮމިޝަންގައި މަސައްކަތް ކުރެއްވި ދުވަސްތަކުގައި އެމަނިކުފާނަށް ދެއްވި އެހީތެރިކަމާއި އެއްބާރު ލެއްވުމަށް ޙަބީބު ވަނީ ޝުކުރުއަދާކުރައްވާފައެވެ.