ފެނަކައިގެ ކޮންޓްރެކްޓް ސްޓާފުންގެ ތެރެއިން މުސާރަ އާއި އިނާޔަތްތައް ޖަމާކޮށް ނުދެވި ހުރި މުވައްޒަފުންނަށް މިއަދު ފައިސާ ޖަމާކޮށްދިނުމަށް މަސައްކަތް ކުރަމުންދާ ކަމުގައި ފެނަކަ ކޯޕަރޭޝަނުގެ މެނޭޖިންގ ޑައިރެކްޓަރ މުއާޒް މުޙައްމަދު ރަޝީދު ވިދާޅުވެއްޖެއެވެ.

މުއާޒް ވިދާޅުވީ، ފެނަކައިގެ ކޮންޓްރެކްޓް މުވައްޒަފުންނަށް އަބަދުވެސް މުސާރަދެމުން އަންނަނީ ވަކިން ކަމަށާއި، ކުންފުނީގެ ދާއިމީ ހުރިހާ މުވައްޒަފުންނަށް މުސާރަ ދެމުން އަންނަނީ އެއް ޕޭރޯލެއްގެ ތެރެއިން ކަމުގައި މުއާޒް ވިދާޅުވިއެވެ.

ފެނަކަ ކުޅުދުއްފުށީ އިންޖީނުގެ އިމާރާތްކުރުމުގެ މަސައްކަތަށް ނަގާފައިވާ ކޮންޓްރެކްޓް ސްޓާފުންގެ ތެރެއިން ބައެއް މީހުން ވަނީ މިއަދު މުޒާހަރާކޮށްފައެވެ.

Advertisement

އެމީހުން ބުނެފައި ވަނީ، އެމީހުންނަށް ފެބުރުއަރީ މަހުގެ މުސާރަވެސް ދީފައި ނުވާ ކަމަށާއި، ރަމަޟާން މަހުގެ އިނާޔަތު ފައިސާވެސް ދީފައި ނުވާ ކަމަށެވެ. އެހެންވެ އިހްތިޖާޖުކުރީ އެމީހުންގެ ހައްޤުތައް ހޯދަން ކަމުގައި އެމުވައްޒަފުންގެ ތެރެއިން ބައެއް މީހުން ވަނީ ބުނެފައެވެ.

ފެނަކަ ކޯޕަރޭޝަންގެ ދަރަނިތައް ބޮޑުވެ އެކުންފުނި އޮތީ މާލީ ހާލަތު ވަރަށް ގޯސްވެފައެވެ. އެކުންފުނިން އަޅަންފަށާފައި ހުރި ބައެއް އިންޖީނުގެ ތަކުގެ މަސައްކަތްތައް ހުއްޓިފައި ވާއިރު އެތަންތަނުގައި މަސައްކަތް ކުރުމަށް ނަގާފައިވާ ކޮންޓްރެކްޓް މުވައްޒަފުން ކޮންޓްރެކްޓް އާނުކޮށް ދޫކޮށްލަމުންދާތީ ފެނަކައަށް ފާޑުކިޔުންތައް ވަނީ އަމާޒުވެފައެވެ.