އިންގްލިޝް ޕްރިމިއަ ލީގުގައި އެންމެ ފަހުގެ ޗެމްޕިއަން މެންޗެސްޓާ ސިޓީ އާއި ލިވަޕޫލް ބައްދަލުކުރި މެޗު 1-1 އިން އެއްވަރުވެ، ލީގު ރޭސް އިހުނަށް ވުރެން ވާންވެއްޖެއެވެ. މި ނަތީޖާގެ ސަބަބުން، މި ދަނޑިވަޅުގެ ފައިދާ ނަގާފައި މިވަނީ އާސެނަލްއެވެ.

ހޮނިހިރު ދުވަހުގެރޭ އާސެނަލްއިން ވަނީ ބްރެންޓްފޯޑު ބަލިކޮށް، ލީގުގެ އެއްވަނައަށް އަރާފައެވެ. އަދި ސިޓީ އާއި ލިވަޕޫލްގެ މެޗު އެއްވަރުވުމުން، ލިވަޕޫލާއި ޕޮއިންޓުގެ ގޮތުން ހަމަހަމަ ވިޔަސް، އާސެނަލް އޮތީ 7 ގޯލުގެ ތަފާތުން ލީގުގެ އެއްވަނައިގައެވެ. 

އެގޮތުން އާސެނަލް އާއި ލިވަޕޫލަށް 28 މެޗުން ލިބިފައިވަނީ 64 ޕޮއިންޓެވެ. ތިން ވަނައިގައި އޮތް ސިޓީ އޮތީ މި ދެ ޓީމަށް ވުރެން 1 ޕޮއިންޓު މަދުން، 63 ޕޮއިންޓާއެކުއެވެ. 

ސިޓީ އާއި ލިވަޕޫލް ބައްދަލުކުރި މެޗުގައި ފުރަތަމަ ލީޑު ނަގާފައިވަނީ ސިޓީއިންނެވެ. އެ ޓީމަށް މެޗުގެ 23 ވަނަ މިނެޓުގައި ލިބުނު ކޯނަރު، ކެވިން ޑި ބްރޫނޭ ތިރިން ނަގައިދިނީ ލިވަޕޫލްގެ ޕެނަލްޓީ އޭރިޔާ ތެރޭގައި ހުސްކޮށް ހުރި ސްޓޯންސްއަށެވެ. އޭނާ ގޯލަށް ބޯޅަ ފޮނުވާލީ ވަރަށް ފަސޭހަކަމާއެކުއެވެ. 

ލިވަޕޫލުން މެޗުގެ ނަތީޖާ ހަމަހަމަ ކޮށްފައިވަނީ ދެވަނަ ހާފުގައި ލިބުނު ޕެނަލްޓީއަކުންނެވެ. ލިވަޕޫލްގެ އުރުގުއޭ ފޯވާޑް، ނުނިއޭޒް އަށް ސިޓީގެ ކީޕަރު އެޑަސަން ކުރި ފައުލަކަށް ލިބުނު ޕެނަލްޓީ އެ ޓީމަށް ކާމިޔާބުކޮށްދީފައިވަނީ އެލެކްސިސް މެކަލިސްޓާއެވެ. 

ލީގު ރޭހުގައި ދެން އެންމެ މުހިންމުވާނެ މެޗެއްކަމަށް ބެލެވޭނީ މީގެ ދެ ހަފްތާ ފަހުން އާސެނަލް އާއި ސިޓީ ބައްދަލުކުރާ މެޗެވެ.