ރާއްޖޭގައި ޢީދު ނަމާދު ކުރާ ގަޑިއަކީ ހެނދުނު 7:00ކަމަށް ކަނޑައެޅުމާއި ގުޅޭ ގޮތުން މިނިސްޓަރ އޮފް އިސްލާމިކް އެފެއާޒް ޑރ. މުޙައްމަދު ޝަހީމް ޢަލީ ސައީދު، ހަނދާއި ބެހޭ ކޮމިޓީގެ މެމްބަރުންނާއި އެކު މަޝްވަރާކުރައްވައިފިއެވެ.

މިނިސްޓަރ ޑރ. ޝަހީމް ވިދާޅުވީ، އީދު ނަމާދު ކުރާ ވަގުތު ބަދަލު ކުރުމާއި ގުޅޭ ގޮތުން، އިސްލާމީ ކަންތައްތަކާއި ބެހޭ މަޖިލީހާއި އަދި ދީނީ ޢިލްމުވެރިންނާއި ކުރީގެ ރައީސުލްޖުމްހޫރިއްޔާ އަލްއުސްތާޛު މައުމޫނު ޢަބުދުލްޤައްޔޫމާއިވެސް މަޝްވަރާކުރައްވާފައިވާ ކަމަށެވެ.

މިނިސްޓަރ ޝަހީމް ވިދާޅުވީ، އީދު ނަމާދު ކުރާ ވަގުތު ބަދަލުކުރުން ރަނގަޅުކަން އެފަރާތްތަކުންވެސް ފާހަގަ ކުރައްވާފައިވާ ކަމަށެވެ. ރާއްޖޭގައި ޒަމާނުއްސުރެ އީދު ނަމާދު ކުރަމުން އައިސްފައި ވަނީ، ހެނދުނު 7:30ގައި މިސްކިތްތަކުގައި ކަމަށާއި، އެހެން ނަމަވެސް މިހާރު ބޮޑު ޖަމާއަތްތަކުގައި މައިދާންތަކުގައި ނަމާދު ކުރާތީ އެވަގުތަށް އަވިއަރާފައި އޮންނާނީ ނަމާދު ކުރާ މީހުންނަށް ދަތިވާ ކަމަށެވެ.

ރާއްޖޭގައި ޒަމާނުއްސުރެ ޢިދު ނަމާދު ކުރުމުގައި، ހެނދުނު 7:00ގައި ޖަމާއަތް ހަދަންފަށައި ތަކުބީރު ފަށައެވެ. އަދި 7:30ގައި ނަމާދުކޮށް ޚުތުބާ ކިޔަން ފަށާއިރު، ނަމާދުގެ ޖަމާއަތުގެ ތެރޭގައި ޚުތުބާ އަޑުއަހަން މީހުން ނުތިބޭކަންވެސް ފާހަގަކުރެވިފައެވެ.