ބަރަކާތްތެރި ރަމަޟާން މަހުގެ ފުރަތަމަ ދުވަހަކީ، 11 މާރިޗު 2024ވާ ހޯމަދުވަސް (މާދަމާ) ކަމުގައި މިނިސްޓްރީ އޮފް އިސްލާމިކް އެފެއާޒުން ކަނޑައަޅައިފިއެވެ.

މިނިސްޓްރީ އޮފް އިސްލާމިކް އެފެއާޒުން މިގޮތަށް ކަނޑައަޅުއްވާފައި ވަނީ، ހަނދާއި ބެހޭ ކޮމިޓީގެ ބައްދަލުވުމަށް ފަހުގައެވެ. ހަނދާއި ބެހޭ ގޮތުން މިރޭ އިއްވެވި ހަނދާއި ބެހޭ ޤަރާރުގައި ވިދާޅުވީ، ރަމަޟާން މަހާއި ޝައްވާލު މަސް ފެށުމުގައި ދިވެހިރާއްޖެއިން ޢަމަލުކުރަމުން އަންނަ ގޮތުގެ މަތީ، ސަޢޫދީ އަރަބިއްޔާ އާއި އިސްލާމީ އެހެން ޤައުމުތަކަށްވެސް ރަމަޟާން މަހުގެ ހަނދު ސާބިތުކުރެވިފައި ވާތީ، ރާއްޖެއިންވެސް ރަމަޟާން މަހުގެ ފުރަތަމަ ދުވަހަކީ، މާދަމާ ކަމުގައި ކަނޑައަޅާފައިވާ ކަމަށެވެ.

މާދަމާއަކީ ރަމަޟާން މަހުގެ ފުރަތަމަ ދުވަސްކަމުގައި ކަނޑައެޅުމާއި ގުޅިގެން، ތަރާވީޙް ނަމާދު ކުރުމަށް ކަނޑައަޅާފައިވާ މިސްކިތްތަކުގައި މާލެ ހުޅުމާލެ އަދި އަތޮޅު ތެރޭގައިވެސް ތަރާވީޙް ނަމާދު ކުރާނެއެވެ.