ޖަލުގައި ތިބި ޤައިދީންތަކެއް މޯބައިލް ފޯނާއި އެހެނިހެން އިލެކްޓްރޯނިކް އާލާތްތައް ބޭނުންކޮށްގެން މަކަރާއި ހީލަތުން މީހެއްގެ އަތުން ބައިމިލިޔަން ރުފިޔާ ފޭރިގަތް މައްސަލައެއްގައި، މާފުީ ޖަލު ބަލާ ފާސްކޮށް ގިނަ އަދަދެއްގެ ފޯނާއި އެއާގުޅޭ ސާމާނުތަކެއް ފުލުހުން އަތުލައިގެންފިއެވެ.

ފުލުހުންގެ އިދާރާއިން ވިދާޅުވީ، ދިވެހި ފުލުހުންގެ ޚިދުމަތަށް ހުށަހެޅި ބަލަމުންދާ، މަކަރާއި ހީލަތުން ފަސްލައްކަ ރުފިޔާ އަތުލާފައިވާ މައްސަލައަކާއި މަކަރާއި ހީލަތުގެ އިތުރު އެހެން މައްސަލައަކާ ގުޅިގެން މިމާރިޗު މަހުގެ 6 ވަނަ ދުވަހު، ޚާއްޞަ އޮޕަރޭޝަނެއް ހިންގާފައިވާ ކަމަށެވެ. 

މިގޮތުން އެ އޮޕަރޭޝަނުގައި، މާފުށި ޖަލުގެ ބައެއް ގޮޅިތައް ބަލައި ފާސްކޮޮށް 22 މޯބައިލް ފޯނާއި، 10 ޗާޖަރާއި، 10 ހެޑްސެޓް/އެއާޕޮޑްގެ އިތުރުން ދެ ސިމްކާޑު އަދި މޯބައިލް ފޯނުގެ ބައިތަކެއްގެ އިތުރުން މައްސަލައާ ގުޅުންހުރި އިތުރު ހެކިތައް ހޯދާފައިވާ ކަމުގައި ފުލުހުންގެ އިދާރާއިން ވިދާޅުވިއެވެ.

ފުލުހުންގެ އިދާރާއިން ވިދާޅުވީ، އެ މައްސަލަ ފުލުހުންގެ އިދާރާއިން ބަލައި ތަޙްޤީޤު ކުރަމުން ގެންދާ ކަމަށެވެ.