ސަރުކާރުގެ ޚަރަދުގައި މިއަހަރު ހައްޖަށް ފޮނުވާނެ މީހުން ކަނޑައެޅުމަށް ގުރުއަތު ނަގައިފިއެވެ.

މިގުރުއަތު ނަގާފައި ވަނީ މިއަދު އެކަމަށްޓަކައި ބޭއްވި ޚާއްޞަ ރަސްމިއްޔާތެއްގައެވެ. މިރަސްމިއްޔާތުގައި ވަނީ ސަރުކާރުގެ ޚަރަދުގައި ހައްޖަށް ފޮނުވުމަށް ކަނޑައަޅާފައިވާ ޝަރުޠުތައް ފުރިހަމަވާ މީހުންގެ ތެރޭގައި ހިމެނޭ 50 މީހުން ގުރުއަތުން ހޮވާފައެވެ. ގުރުއަތުގައި ބައިވެރިކޮށްފައި ވަނީ ޝަރުޠު ހަމަވާ މީހުންގެ އައިޑީކާޑު ނަމްބަރުތައް ހޮވާފައެވެ.

ގުރުއަތުގައި ބައިވެރިވެރިކޮށްފައި ވަނީ ފަޤީރުންގެ ލިސްޓުގައި ހިމެނޭ މީހުންނެވެ. ގުރުނަގައި ދައްކާލާފައި ވަނީ އެ މީހުންގެ އައިޑީކާޑު ނަމްބަރުތަކެވެ.

މިނިސްޓްރި އޮފް އިސްލާމިކް އެފެއާޒުން ވިދާޅުވީ، ގުރުއަތުން ހޮވޭ 50 މީހުންގެ ތެރެއިން އެއްވެސް މީހަކު މިއަހަރު ހައްޖަށް ދިޔުމަށް ޢުޒުރުވެރިވާނަމަ، އިތުރު މީހަކަށް ފުރުޞަތު ދޭނެ ކަމަށެވެ. މިގޮތުން ރިޒާވް ލިސްޓުގައި ހިމެނުމަށް 10 ފަރާތެއްވެސް ވަނީ ގުރުއަތުން ކަނޑައަޅާފައެވެ.

ފަޤީރުންގެ ދަފްތަރުގައި ޝަރުޠުހަމަވާ 982 މީހުން ތިބި އިރު، މިއަދު ގުރުއަތު ނަގާފައި ވަނީ، އެލިސްޓްގައި ހިމެނޭ އުމުރުން 50 އަހަރާއި 69 އަހަރާއި ދެމެދުގެ 667 މީހުންގެ މެދުގައެވެ.