މިހަފްތާ ބަންދުގައި މާލޭގެ މަގުމަތިން 123 އުޅަނދެއް ނަގައި ނައްތާލެވިފައިވާ ކަމުގައި ޓްރާންސްޕޯޓް މިނިސްޓްރީން ވިދާޅުވެއްްޖެއެވެ.

އެމިނިސްޓްރީން ވިދާޅުވީ، ޓްރެފިކް ޑިކޮންޖެސްޝަން ޕްރޮގްރާމުގެ ދަށުން މި ހަފްތާގެ ބުރާސްފަތި، ހުކުރު އަދި ހޮނިހިރު ދުވަހު ކުރެވުނު މަސައްކަތުން ގިނަ ދުވަސްވަންދެން ބޭނުންނުކޮށް މާލެ އަދި ހުޅުމާލޭގެ މަގުތަކުގައި ބަހައްޓާފައިހުރި އުޅަނދު ތަކުގެ ތެރެއިން ޖުމްލަ 123 އުޅަނދެއް ނަގައި ތިލަފުއްޓަށް ގެންގޮސް ނައްތާލެވިފައިވާ ކަމަށެވެ. އެއާއެކު މިހާތަނަށް ނައްތާލެވުނު އުޅަނދުތަކުގެ އަދަދު، 281 އަރާފައި ވާކަމުގައިވެސް އެ މިނިސްޓްރީން ވަނީ ވިދާޅުވެފައެވެ.

ބޭނުން ނުކޮށް ދިގު މުއްދަތަކަށް މަގުމަތީގައި ބަހައްޓާފައިވާ އުޅަނދުތައް ނައްތާލުން ހިމެނޭ ގޮތަށް، މާލެ ސަރަހައްދުގެ މަގުތައް ތޮއްޖެހިފައިވާ މައްސަލަ ހައްލުކުރުމަށްޓަކައި ޓްރާންސްޕޯޓް މިނިސްޓްރީން ޓްރެފިކް ޑިކޮންޖެސްޝަން ޕްރޮގްރާމް ފެށީ، ހުސްވި ފެބުރުއަރީ މަހުގެ 17 ވަނަ ދުވަހުގައެވެ.

މާލޭގެ އިތުރުން ހުޅުމާލޭގައި، ޚާއްޞަކޮށް ހުޅުމާލެ ސިނާޢީ ސަރަހައްދުގައި އެފަދަ ބައު އުޅަނދުތައް ގިނައެވެ.