ރާއްޖޭގައި ޤަވާއިދާއި ޚިލާފަށް އުޅޭ ބިދޭސީންގެ ސަބަބުން ނުކުންނަ މައްސަލަތައް އިތުރުވެފައިރު، މާލޭ ސިޓީ ކައުންސިލްގެ މޭޔަރުކަމުގެ މަޤާމާއި ހަވާލުވެވަޑައިގެންނެވި އިރު މާލޭ ސިޓީކައުންސިލްގައިވެސް ޤަވާއިދާ ޚިލާފަށް ރާއްޖޭގައި އުޅޭ 18 ބިދޭސީއަކު ތިބިކަމުގައި މާލޭ ސިޓީ ކައުންސިލްގެ މޭޔަރު އާދަމް އާޒިމް ވިދާޅުވެއްޖެއެވެ.

މާލޭގެ މަގުތަކަށް ކުނިއަޅާ މައްސަލަ ބޮޑުވެފައި ވާއިރު އެކަމާއިގުޅޭ ގޮތުން މީޑިއާތަކަށް މައުލުމާތު ދެއްވުމަށް ބޭއްވި ބައްދަލުވުމުގައި އާޒިމް ވިދާޅުވީ، އެމަނިކުފާނު މާލޭ ސިޓީކައުންސިލަށް ވަޑައިގެންނެވުމަށް ފަހުގައި، މާލޭ ސިޓީ ކައުންސިލްގައި ތިބި ޤަވާއިދާއި ޚިލާފު ބިދޭސީން އިމިގްރޭޝަނާއި ހަވާލުކޮށްފައިވާ ކަމަށެވެ. އާޒިމް ވިދާޅުވީ އެ ބިދޭސީންނަކީ، ސީދާ ކައުންސިލްގެ މުވައްޒަފުން ނޫންކަމަށާއި އެހެން ނަމަވެސް އެއީ ސިޓީ ކައުންސިލުން ކޮންޓްރެކްޓް މަސައްކަތްތައް ކުރުމަށް ހަވާލުކޮށްފައިވާ ކުންފުންޏެއްގެ ދަށުން މާލޭ ސިޓީކައުންސިލްގެ ދަށުގައި ތިބި ބައެއް ކަމަށެވެ. 

އާޒިމް ވިދާޅުވީ، ދައުލަތުގެ އިދާރާއެއްގެ މަސައްކަތްތައް ޤަވާއިދާއި ޚިލާފަށް ރާއްޖޭގައި އުޅޭ ބިދޭސީން ލައްވައި ކުރުވުމަކީ ކޮށްގެންވާނެ ކަމެއްކަމަށް ދެކެވަޑައި ނުގަންނަވާކަމުގައިވެސް އާޒިމް ވިދާޅުވިއެވެ. މާލެ ތެރެއަށް ކުނި އަޅަމުންދާ މައްސަލައަށް އިޝާރާތްކުރައްވައި އާޒިމް ވިދާޅުވީ، މަގުތައް މައްޗަށް ކުނި އެޅުމުގައިވެސް ދިވެހިން ބޭނުން ކުރަނީ، ޤަވާއިދާއި ޚިލާފަށް އުޅޭ ބިދޭސީން ކަމަށެވެ. އެގޮތަށް ދިމާވަނީ ޤަވާއިދާއި ޚިލާފަށް އުޅޭ ބިދޭސީންގެ މައްޗަށް ޤާނޫނު ތަންފީޒު ނުކުރެވޭތީ ކަމަށާއި، އެފަދަ މީހުން ކުނިއަޅައިގެން ޖޫރިމަނާ ކުރެވޭނެ ގޮތެއްވެސް ނޯންނަ ކަމުގައި އާޒިމް ވިދާޅުވިއެވެ.

އާޒިމް ވިދާޅުވީ މާލޭގައި ހުރި މައްސަލަތައް ހައްލު ކުރުމަށްވެސް އެންމެ ފުރަތަމަ ކުރަންޖެހޭ ކަމަކީ ޤަވާއިދާއި ޚިލާފަށް އުޅޭ ބިދޭސީންގެ މައްސަލަ ހައްލު ކުރުން ކަމަށާއި އެމީހުންގެ މައްޗަށް ޤާނޫނުތައް ތަންފީޒް ނުކުރެވި މިހާރު ދިމާވެފައި ހުރި މައްސަލަތަކަށް ދެމެހެއްޓެނިވި ހައްލެއް ނުގެނެވޭނެ ކަމަށެވެ.