ރޯދަ މަހައް ތައްޔާރުވުމުގެ ގޮތުން ގޯތިގެދޮރު ސާފުކޮށް މާލެ އާއި ހުޅުމާލޭގެ މަގުމަތި މުޅިން ގޮނޑުކޮށްލައިފިއެވެ.

މާލޭގެ ބައެއް މަގުތަކާއި ގޯޅިތަކުގައި އަދި ހުޅުމާލޭގެވެސް ބައެއް ސަރަހައްދުތަކަށް ގިނަ އަދަދެއްގެ ކުނި އަޅާފައިވާ އިރު އެތަކެތި ނަގައި ސާފު ކުރުމުގެ މަސައްކަތް އެޗްޑީސީންނާއި، ވެމްކޯއިން އަދި މާލޭ ސިޓީ ކައުންސިލުންވެސް ދަނީ ކުރަމުންނެވެ. އެހެން ނަމަވެސް މަގުތައް މަތިން ކުނި ނަގަމުންދާ ވަރަކަށް މީހުން ކުނި އަޅަމުންދާކަންވެސް އިދާރާތަކުން ވަނީ ފާހަގަކޮށްފައެވެ.

މާލޭ ސިޓީ ކައުންސިލްގެ މޭޔަރު އާދަމް އާޒިމް ވިދާޅުވީ، ފާއިތުވި ހަފްތާގައި މާލޭ ސިޓީ ކައުންސިލުން އެކަނިވެސް މަގުތައް މަތިން 140 ޓަނު ކުނި ނަގާފައިވާ ކަމަށާއި، އެއީ އެވްރެޖްކޮށް ދުވާލެއްގެ މައްޗަށް 20 ޓަނުގެ ކުނި ކަމަށެވެ. އާޒިމް ވިދާޅުވީ، މާލޭގެ މަގުތައް މައްޗަށް ކުނިއަޅަމުންދާ މިންވަރަށް ބަލާއިރު އެކުނިތައް ނަގައި ދުވަހުން ދުވަހަށް ސާފުކުރުމުގެ ކެޕޭސިޓީއެއް، މާލެ ސިޓީކައުންސިލާއި ވެމްކޯގައިވެސް ނެތް ކަމަށެވެ. އެހެންކަމުން އާއްމުން ޒިންމާދާރު ވުމަށާއި، މަގުތައް މައްޗަށް ކުނި ނޭޅުމަށް އާޒިމް އެދިވަޑައިގެންނެވިއެވެ.

މާލޭގެ މަގުތައް މައްޗަށް ކުނިއެޅުމުގެ މައްސަލައަކީ ހައްލުނުވެ އެތައް ޒަމާންވީ މައްސަލައެއްކަން ފާހަގަކުރައްވައި އާޒިމް ވިދާޅުވީ، އެމައްސަލައަށް ދެމެހެއްޓެނިވި ހައްލެއް ހޯދުމަށް ސިޓީ ކައުންސިލުން މަސައްކަތްތައް ކުރަމުންދާ ކަމަށެވެ. އަދި އެކަމަށް ކަމާގުޅޭ މުުއައްސަސާތަކާއި އެކު އެކަށީގެންވާ މަސައްކަތްތަކެއް ކުރެވޭތޯ މަސައްކަތް ކުރައްވަމުން ގެންދަވާ ކަމުގައިވެސް އާޒިމް ވިދާޅުވިއެވެ.

މާލޭ ސިޓީގެ މަގުތައް މައްޗަށް ގިނަ އަދަދެއްގެ ކުނި އަޅާފައިވާތީ އެކަމާއި ގުޅިގެން އާއްމުންވެސް އަންނަނީ ކަންބޮޑުވުންތައް ފާޅުކުރަމުންނެވެ.