އަތޮޅުތެރޭގެ ތަރައްޤީގެ މަޝްރޫއުތައް ހުއްޓިފައި އޮތީ, މަޝްރޫޢުތައް ހިންގަމުންދާ ކުންފުނިތަކަށް ދޭންޖެހޭ ފައިސާ ސަރުކާރަށް ފައިސާ ނުދެވިގެން ކަމުަގައި ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، ފާދިއްޕޮޅިގެ ރަށްރަށަށް އިއްޔެ އެމަނިކުފާނު ކުރެއްވި ރަސްމީ ދަތުރުފުޅުގައި، ޅ. ހިންނަވަރަށް ވަޑައިގެން އެރަށުގެ ރައްޔިތުންނާއި ބައްދަލުކުރައްވައި ދެއްކެވި ވާހަކަފުޅުގައެވެ.

ރައީސުލްޖުމްހޫރިއްޔާގެ ވާހަކަފުޅުގައި ވިދާޅުވީ، ހިންނަވަރުގައި ހިނގަމުން ދިޔަ ހައުސިންގަ މަޝްރޫއުގެ މަސައްކަތްތައްވެސް މަޑު ޖެހިފައި އޮތީ، އެމަޝްރޫޢު ކުރިޔަށް ގެންދާ ކުންފުންޏަށް ސަރުކާރުން ދޭންޖެހޭ ފައިސާ ނުދެވި އޮވެގެން ކަމަށެވެ. މިގޮތުން ސަރުކާރުން ވަރަށް ގިނަ ކުންފުނިތަކަށާއި އަމިއްލަ ފަރާތްތަކަށް ދައްކަންޖެހޭ ފައިސާ އެބަހުރި ކަމަށާއި އެފައިސާގެ އަދަދު 9 ބިލިއަނަށް އަރާކަމަށް ވިދާޅުވާ ވިދާޅުވުން ތަކުރާރު ކުރެއްވިއެވެ.

"މި ރަށުގައިވެސް ހައުސިންގ މަޝްރޫޢު ހުއްޓިފައި އޮތީ، ބިލުތައް ގިނަކަމުން. ހައުސިންގ މިނިސްޓްރީން، ފިނޭންސް މިނިސްޓްރީއާ ވާހަކަ ދައްކައިގެން، ޕޭމަންޓްސްތައް ހަދަން އެބަ ވަރަށް މަސައްކަތް ކުރޭ. ވަރަށް އަވަހަށް މަޝްރޫޢު އަލުން ރީ-ސްޓާޓް ވާނެ."

ރައީސުލްޖުމްހޫރިއްޔާ ވިދާޅުވީ، ކުރީ ސަރުކާރުން ފަށާފައިވާ ހައުސިންގ މަޝްރޫޢު އަލުން ކުރިޔަށް ގެންދިޔުމުގެ އިތުރުން މިސަރުކާރުންވެސް ހިންނަވަރުގައި ހައުސިންގ މަޝްރޫޢެއް ކުރިޔަށް ގެންދަވާނެ ކަމަށެވެ. އަދި އެކަން މިއަހަރުގެ ބަޖެޓުގައި ހިމަނާފައިވާ ކަމަށާއި ބޯހިޔާވަހިކަމުގެ އައު މަޝްރޫޢު މިއަހަރުގެ ތެރޭގައި ފައްޓަވާނެ ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.

އަދި މިސަރުކާރުން، މުޅި ރާއްޖޭގެ އެކި ކަންކޮޅުގައި، ފަސް އަހަރުގެ ތެރޭގައި ސާޅީސްހާސް ގެދޮރު، ހައުސިންގ ޔުނިޓް ޤާއިމުކުރުމަށްޓަކައި، ހިންގަން ނިންމާފައި މިއޮތް ހައުސިންގ މަޝްރޫޢު ބެހިގެންދާއިރުވެސް އޭގެ ތެރޭގައި ހިންނަވަރު ހިމެނިގެންދާނެ ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.

ރައީސުލްޖުމްހޫރިއްޔާގެ ވާހަކަފުޅުގައި ވަނީ، ސަރުކާރާއިއެކު މަސައްކަތް ކުރައްވާނޭ މެމްބަރުން ރައްޔިތުންގެ މަޖިލީހަށް ހޮއްވަވައި ދެއްވުމަށް އިލްތިމާސްކުރައްވާފައެވެ.