ރޯދަމަހާ ދިމާކޮށް ބާޒާރުގައި ލުނބޯގެ އަގު މައްޗަށް ދާން ފެށުމާ ގުޅިގެން، ލުނބޯގެ އަގު ކޮންޓްރޯލް ކުރުމަށް އެސްޓީއޯއިން ލުނބޯ އެތެރެކޮށް ވިއްކަން ފަށައިފިއެވެ. 

މިހާރު ބާޒާރުގައި ލުނބޯ ކިލޯއެއްގެ އަގު އުޅެނީ ކިލޯއެއް 65ރ. އާއި 75ރ. އާއި ދެމެދުގެ އަގު ތަކެއްގައެވެ. މިއީ ނިމިދިޔަ ފެބުރުވަރީ މަހު ވެސް ލުބޯގެ އަގު އުޅުނު ވަރެވެ. ނަމަވެސް އެސްޓީއޯއިން ލުބޯ ރީޓެއިލްކޮށް ވިއްކަނީ ކިލޯއެއް 50ރ. އަށެވެ. 

ރޯދަމަހާ ދިމާކޮށް އާންމު ގޮތެއްގައި ވިޔަފާރިތަކުން ލުނބޯގެ އަގު މަތިކުރެއެވެ. އެގޮތުން 1443 ވަނަ އަހަރުގެ ރޯދަޔަށް ލުބޯ ކިލޯއެއް 120ރ. އާ ހަމައަށް އުފުލުނުއިރު، މިދިޔަ ރޯދަ މަހާ ދިމާކޮށް ލުނބޯ ކިލޯއެއްގެ އަގު އުޅުނީ 100ރ. އިން މަތީގައެވެ. ނަމަވެސް ކޮންމެ އަހަރެއްގައި ބާޒާރުގެ އަގުތައް ކޮންޓްރޯލް ކުރުމަށް އެސްޓީއޯއިން ތައްޔާރުވެއެވެ.

Advertisement

އެސްޓީއޯއިން މި އަހަރު ހޯލްސޭލް ކުރާ 25 ކިލޯގެ ލުނބޯ ބައްތާ ލިބެން ހުންނާނީ 1،175ރ. އަށް ކަމަށް އެ ކުންފުނިން ބުނެއެވެ.

އެސްޓީއޯއިން އަންނަނީ މި ރޯދަމަހާ ދިމާކޮށް ދިވެހީންނަށް ހަދިޔާ ވެސް ދޫކުރަމުންނެވެ. އެ ގޮތުން ކޮންމެ ގޭބިސީއަކަށް 10 ކިލޯ ބާސްމަތީ ހަނޑުލާއި 10 ކިލޯ ފުށް މިހާރު އަންނަނީ ދޫކުރަމުންނެވެ.