މި އަހަރުގެ މިސް ވޯލްޑްގެ މަގާމު ޗެކް ރިޕަބްލިކްގެ ކްރިސްޓީނާ ޕިޒްކޯވާ ހޯދައިފިއެވެ. މިސް ވޯލްޑް 2024 އިއުލާން ކޮށްފައިވަނީ އިންޑިއާގެ މުމްބާއީގައި ހޮނިހިރު ދުވަހުގެރޭ ބޭއްވި ހާއްސަ ހަފްލާއެއް ގައެވެ. 

ޕިޒްކޯވާ މި އަހަރުގެ މިސް ވޯލްޑަށް ހޮވިފައިމިވަނީ ދުނިޔޭގެ އެކި ކަންކޮޅުތަކުން ޖުމްލަ 111 ބައިވެރިންނާ ވާދަކޮށްގެންނެވެ. އޭނާއަކީ ގާނޫނު ކިޔަވަމުންދާ ކުއްޖެކެވެ. 

މިސް ވޯލްޑް ހޮވަނީ ގިނަ ދާއިރާތަކަކުން ވާދަވެރިންގެ ހުނަރު ޓެސްޓު ކުރުމަށްފަހުއެވެ. އެގޮތުން ފިޓްނަސް އާއި ރީތިކަމާއި ހުނަރާއި އަދި ޕަބްލިކް ސްޕީކިންގެ ހުނަރުތައް ޓެސްޓުކޮށްފައިވެއެވެ. މި ނަތީޖާތަކަށް ބަލައި، މިސް ވޯލްޑާއި އެންމެ ކައިރިން ވާދަކުރާ 40 ނަމެއް، ހޮނިހިރު ދުވަހުގެރޭ ބޭއްވި ހަފްލާ ފެށިއިރު ވަނީ އިއުލާންކޮށްފައެވެ. 

ފުރަތަމަ އިއުލާންކުރި 40 ކުދިން ދެން މަދުކުރީ 12 އަށެވެ. އަދި އެއަށްފަހު 8 އަށެވެ. މި 8 ވާދަވެރިންނަށް ވަނީ ސުވާލާއި ޖަވާބުގެ ބުރެއް ބާއްވާފައެވެ. މި ބައިގައި ސުވާލުކޮށްފައިވަނީ މިފަހުން ބޭއްވި G20 ސަމިޓާ ގުޅިގެންނެވެ. 

އުމުރުން 23 އަހަރުގެ ޕިޒްކޯވާއަށް، އަންހެނުންގެ ސިއްހަތާ ގުޅުންހުރި މައްސަލައެއްގައި އެހެން މީހުން ދެކޭ ގޮތް ބަދަލުކުރާނެ ގޮތާ ގުޅޭ ގޮތުން ސުވާލު ކުރުމުން އޭނާގެ ޖަވާބު އަމާޒުކުރީ އަންހެނުންގެ ޕީރިއަޑްސްއާއެވެ. ޖުމްލަ ގޮތެއްގައި އޭނާ ބުނީ، އަންހެނަކަށް ވުމަކީ ހަދިޔާއެއް ކަމަށާއި، ޕީރިއަޑްސްއަކީ އަންހެނުންނާ ގުޅިގެން މުޖުތަމައުއިން ދެކޭ ގޮތް ބަދަލުކުރަންޖެހޭ ކަމެއް ނޫން ކަމަށެވެ. 

މިސް ވޯލްޑް މުބާރާތަކީ 1951 ގައި އިނގިރޭސިވިލާތުގައި ފެށި މުބާރާތެކެވެ. މި މުބާރާތް ކާމިޔާބުކުރި އެންމެ މަޝްހޫރު ދެ ފަރާތަކީ، އިންޑިއާގެ ފިލްމީ ތަރިން ކަމުގައިވާ އައިޝްވާރިޔާ ރާއި (މިސް ވޯލްޑް 1994) އާއި ޕްރިޔަންކާ ޗޯޕްރާ (މިސް ވޯލްޑް 2000)އެވެ. 

ތާވަލު ނުކުރެވުމުގެ ސަބަބުން މިދިޔަ އަހަރުގެ މިސް ވޯލްޑް ކޮންޓެސްޓް ބާއްވާފައެއްނުވެއެވެ. އެހެންކަމުން، އެންމެ ފަހުގެ މިސް ވޯލްޑަކީ މާޗު 2022 ގައި އެ މަގާމު ހާސިލްކުރި ޕޮލަންޑުގެ ކެރޮލީނާ ބޮލޯސްކާއެވެ.