އިންގްލިޝް ޕްރިމިއަ ލީގުގައި އާސެނަލް އާއި ބްރެންޓްފޯޑު ބައްދަލުކުރި މެޗު 2-1 އިން ކާމިޔާބުކޮށް، ގިނަ ދުވަސްތަކަކަށްފަހު ލީގުގެ އެއްވަނައަށް އާސެނަލް އަރައިފިއެވެ. މި ކާމިޔާބާއެކު އާސެނަލްއަށް އޮތް ހިތްހަމަ ޖެހުމަކީ، އާދީއްތަ ދުވަހު ލީގުގެ ބޮޑު ދެ ބާރު ކަމުގައިވާ ލިވަޕޫލާއި މެންޗެސްޓާ ސިޓީގެ ކުރިމަތިލުން ތާވަލުކޮށްފައި އޮތުމެވެ. 

ހޮނިހިރު ދުވަހުގެ މެޗުގައި ފުރަތަމަ ލީޑު ނަގާފައިވަނީ އާސެނަލްއިންނެވެ. އެއީ މެޗުގެ 19 މިނެޓުގައި ބެން ވައިޓް ހުރަސްކުރި ހުރަހަކުން ޑެކްލަން ރައިސް ބޮލުން ކާމިޔާބުކުރި ގޯލެކެވެ. ފުރަތަމަ ހާފުގައި މޮޅަށް ކުޅެ މެޗުގެ ކޮންޓްރޯލް ނަގަމުން ދިޔަ އާސެނަލްއަށް މި ލީޑު ގެއްލުނީ ފުރަތަމަ ހާފުގެ އިތުރު ވަގުތުގައި އެ ޓީމުގެ ކީޕަރު، އާރޮން ރަމްސްޑޭލަށް ހެދުނު ގޯހެއްގެ އެޑްވަންޓޭޖު ނަގައި، ބްރެންޓްފޯޑުގެ ޔޯން ވިޒާ ކާމިޔާބުކުރި ގޯލަކުންނެވެ. 

ލީގުގެ މުހިންމު ދަނޑިވަޅެއްގައި ލީޑު ނެގުމަށް ފުރުސަތު ލިބިފައި އޮތް އާސެނަލްއަށް މެޗުގެ 3 ޕޮއިންޓު ޔަގީން ކުރެވުނީ މެޗު ނިމެން 4 މިނެޓަށް ވެފައިވަނިކޮށް ކައި ހަވަޓްސް ކާމިޔާބުކުރި ގޯލަކުންނެވެ. މިއީ ވެސް ބެން ވައިޓުގެ ހުރަހަކުން އާސެނަލް ކާމިޔާބު ކުރި ގޯލެކެވެ. ބެން ވައިޓުގެ ހުރަސް ހަވަޓްސް ގޯލަށް ފޮނުވާލާފައިވަނީ ބޮލުންނެވެ. 

Advertisement

މި މޮޅާއެކު އާސެނަލް 64 ޕޮއިންޓާއެކު ލީގުގެ އެއްވަނައިގައި އޮތްއިރު، ދެވަނައިގައި އޮތް ލިވަޕޫލަށް ލިބިފައިވަނީ 63 ޕޮއިންޓެވެ. އަދި ސިޓީ ތިންވަނައިގައި އޮތީ 62 ޕޮއިންޓާއެކުއެވެ. ލިވަޕޫލާއި ސިޓީ އެންފީލްޑުގައި ނިކުންނަ މެޗު އެއްވަރު ވެއްޖެނަމަ، އާސެނަލްއަށް މި ގޭމްވީކް ނިންމާލާނީ ލީގުގެ އެއްވަނައިގައެވެ.