ސްޓެލްކޯގެ ފޯތު ޕަވަރ ޕްރޮޖެކްޓާއި ގުޅިގެން ސްޓެލްކޯގެ ދެކޮށި އެއްކޮށްލުމަށް މީގެ 13 އަހަރު ކުރިން ބަންދުކުރި ގަލޮޅު ދިން އަނދަރާދަ ހިނގުން މިރެއިން ފެށިގެން އާއްމުންނަށް ހުޅުވާލައިފިއެވެ.

އެމަގު އާއްމުކޮށް ހުޅުވާލުމަށްޓަކައި، ސްޓެލްކޯއިން ވަނީ ޚާއްޞަ ރަސްމިއްޔާތެއް ބާއްވާފައެވެ. މިރަސްމިއްޔާތު ޝަރަފްވެރިކޮށްދެއްވައި އެމަގު ހުޅުއްވައިދެއްވީ، މިނިސްޓަރ އޮފް ޓްރާންސްޕޯޓް އެންޑް ސިވިލް އޭވިއޭޝަން މުޙައްމަދު އަމީނާއި، ސްޓެލްކޯގެ މެނޭޖިންގ ޑައިރެކްޓަރ ޙުސައިން ފަޙްމީއެވެ.

ދޮން އަނދަރާދަ ހިނގުން ހުޅުވާލުން -- ފޮޓޯ: ސްޓެލްކޯ

މިރަސްމިއްޔާތުގައި ސްޓެލްކޯގެ އެމްޑީ ޙުސައިން ފަޙްމީ ދެއްކެވި ވާހަކަފުޅުގައި، މަގު ހުޅުވުމުގެ އިރުޝާދު ލިބިވަޑައިގަތީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ފަރާތްޕުޅުން ކަމަށާއި، ރައްޔިތުންގެ ވިންދާއި އެއްގޮތައް އެމަނިކުފާނު އަބަދުވެސް މަސައްކަތް ކުރައްވަމުންގެންދަވާތީ ޝުކުރު ދަންނަވާކަމަށެވެ. އަދި މި މަގު ހުޅުވާލުމާއިއެކު، އެކަމުގެ ލުއި ފަސޭހަތައް މާލޭގެ ރައްޔިތުންނަށް ލިބިގެންދާނެ ކަމުގައިވެސް ފަޙްމީ ވިދާޅުވިއެވެ.

މަގު ހުޅުއްވައި ދެއްވައި، ޓްރާންސްޕޯޓް މިނިސްޓަރ އަމީން ދެއްކެވި ވާހަކަފުޅުގައި ވިދާޅުވީ، ސަރުކާރުން ބަދަލުތަކެއްބޭނުން ވެގެން ކުރަމުންގެންދާ އަވަސް މަސައްކަތްތަކުގައި އެންމެ ފުރިހަމަގޮތެއްގައި އެ މަސައްކަތް ކުރަވަމުން ގެންދަވާ ބޭފުޅަކީ، ސްޓެލްކޯގެ މެނޭޖިންގ ޑިރެކްޓަރ ހުސައިން ފަހުމީ ކަމަށެވެ.

ދޮންއަނދަރާދަ ހިނގުން ހުޅުވައިލުމުގެ މަސައްކަތް ސްޓެލްކޯއިން ފެށީ ހުސްވި އަހަރުގެ ޑިސެމްބަރު މަހުގެ 17 ވަނަ ދުވަހުގައެވެ. އެމަގު ހުޅުވާލި އިރު، ސްޓެލްކޯގެ ދެކޮށި ގުޅުވާލުމަށްޓަކައި މަތިން ހިނގާ ބިނގާވެ އުޅެވޭ ގޮތަށް ވަނީ އޯވަރހެޑް ބްރިޖެއް އަޅާފައެވެ.

ގާތްގަނޑަކަށް ތިންމަހެއްހާ ދުވަހުގެ މަސައްކަތުން ދޮން އަނދަރާދަ ހިނގުން ހުޅުވާލެވުނު އިރު، އެކަމަށްޓަކައި ސްޓެލްކޯގެ މުވައްޒަފުން ބުރަ މަސައްކަތްތަކެއް ކުރަން ޖެހުނެވެ. އެމަސައްކަތުގައި އެންމެ ބޮޑު ގޮންޖެހުމަކަށް ދިމާވީ، މަގު ބަންދު ކުރުމަށްފަހު އެމަގުގެ ސަރަހައްދަށް ވާގޮތަށް އިންޖީނުގެ އަޅާފައި ވުމާއި، އިންޖީނުތައް ބެހެއްޓުމަށް ބޮޑެތި ކޮންކްރީޓް ބެޑްތައް އަޅާފައި ވުމެވެ. މިގޮތުން އެތަނުން ތަޅާކައި ނަގަން ޖެހުނު ކޮންކްރީޓް ބެޑުތަކުގެ ބޯމިނުގައި 6 ފޫޓު ހުއްޓެވެ.

ދޮންއަނދަރާދަ ހިނގުން މިރޭ އާއްމު ޓްރެފިކަށް ހުޅުވާލުމާއި އެކު އެސަރަހައްދުގެ ޓްރެފިކަށް ލުއިވެގެން ދާނެއެވެ.