އައްޑޫ ސިޓީގައި ހަށިވިއްކުމުގެ ވިޔަފާރިކުރާކަމަށް ފުލުހުންގެ އިންޓެލިޖެންސަށް ލިބުނު މަޢުލޫމާތައި ގުޅިގެން ހިންގި އޮޕަރޭޝަނެއްގައި ދެތަނެއް ބަލައި ފާސްކޮށް 10 މީހުން ހައްޔަރުކޮށްފިއެވެ.

ފުލުހުންގެ އިދާރާއިން ވިދާޅުވީ، އައްޑޫ ސިޓީގެ ހިތަދޫ އާއި މަރަދޫން ހައްޔަރު ކުރި މީހުންގެ ތެރޭގައި ހިމެނެނީ، ދިވެހި ތިން ފިރިހެނުންނާއި، މިޔަންމާގެ ފިރިހެނަކާއި އިންޑިއާ ފިރިހެނަކާއި، ތައިލެންޑްގެ 5 އަންހެނުންނެވެ.

މިމީހުންގެ ބަންދާއި މެދު ގޮތެއް ނިންމުމަށް ކޯޓަށް ހާޟިރުކުރުމުން، ދިވެހި ދެފިރިހެނުންނާއި ތައިލެންޑްގެ 3 އަންހެނުންނަށް 14 ދުވަސް އަދި ތައިލެންޑްގެ 2 އަންހެނުންނާއި ދިވެހި ފިރިހެނަކާއި މިޔަންމާގެ ފިރިހެންމީހާގެ ބަންދަށް 10 ދުވަސް ވަނީ ޖަހައިދީފައެވެ. މިމައްސަލައިގައި ހައްޔަރުކުރި އިންޑިއާގެ ފިރިހެންމީހާގެ ބަންދަށް ކޯޓުން ޖަހައިދީފައި ވަނީ 4 ދުވަސްކަމަށްވެސް ފުލުހުންގެ އިދާރާއިން ވިދާޅުވިއެވެ.