ޅ. ކުރެންދޫ އާއި ގާތުގައި އޮތް ފަޅުރަށް، ޅޮއްސަލަފުއްޓަކީ ކުރެންދޫގެ ބައެއްގެ ގޮތުގައި ހަމަޖައްސަވައި ދެއްވާނެ ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، ފާދިއްޕޮޅުގެ ރަށްރަށަށް މިއަދު ފެއްޓެވި ދަތުރުފުޅުގައި ކުރެންދޫއަށް ވަޑައިގެން އެރަށުގެ ރައްޔިތުންނާއި ބައްދަލުކުރައްވައި ދެއްކެވި ވާހަކަފުޅުގައެވެ.

ރައީސުލްޖުމްހޫެރިއްޔާ ވިދާޅުވީ، އޮންނަ އުސޫލުތަކުގެ ތެރެއިން ދައުލަތަށް ވެސް އޭގެ އެންމެ ގެއްލުން ކުޑަވާނެ ގޮތަކަށް އެކަންކޮށް، ރަށުގެ ރައްޔިތުންގެ އާންމު މަސްލަހަތާއި ރަށުގެ މުސްތަޤުބަލަށްޓަކައި، އެރަށަކީ ކުރެންދޫގެ ބައެއްގެ ގޮތުގައި ހަމަޖެއްސެވުމަށް ކޮށްދެވެން އޮތް ހުރިހާ ކަމެއް ކޮށްދެއްވާނެ ކަމަށެވެ.

ޅޮއްސަލަފުއްޓަކީ، ކުރެންދޫގެ ބައެއްގެ ގޮތުގައި ހަމަޖައްސައިދެއްވުމަށްޓަކައި އެރަށް ދޫކޮށްފައިވާ ފަރާތުން އެރަށް ވަކިކުރެއްވުމަށް މަސައްކަތް ކުރައްވާނެ ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.

ޅ. ޅޮއްސަލަފުއްޓަކީ، 7 ސެޕްޓެންބަރު 2010ގައި ރައީސުލްޖުމްހޫރިއްޔާ މުޙައްމަދު ނަޝީދުގެ ސަރުކާރުގެ ވަޒީރުންގެ މަޖިލީހުން ނިންމަވައިގެން، ދިހަހާސް ހައުސިންގ ޔުނިޓުގެ މަޝްރޫޢުގެ ދަށުން ލަގްޒަރީވިލާ އަޅާ ރަށެއްގެ ގޮތުގައި ހަމަޖެއްސި ރަށެކެވެ. އެރަށް ދިނީ ގާކޮށްޓާއި އަރަބިއްޔާ ހުރި ބިމުގައި ފްލެޓް އެޅި އިންޑިއާގެ ޓާޓާ ކުންފުންޏަށެވެ.

އިންޑިއާގެ ޓާޓާކުންފުންޏަށް ދީފައިވާ އެރަށް ރައީސް ޔާމީނުގެ ސަރުކާރުގައިވެސް އަތުލާފައި ވަނިކޮށް، އޯޑިއޯން ހުރި ބިމާއި، ނާދީ ހުރިބިން އަދި ޅޮއްސަލަފުށި އަލުން ޓާޓާކުންފުންޏާއި ހަވާލުކުރީ، 15 ޖެނުއަރީ 2022 ގައި އެމްޑީޕީގެ ސަރުކާރުންނެވެ.