ކޮމަންޑޫ ދާއިރާގެ ގޮނޑި ކާމިޔާބު ކުރަން މީގެ ކުރިން ދުވަހަކުވެސް ކުރެވިފައި ނުވާހައި ގިނަ މަސައްކަތް ކުރެވުނު ކަމުގައި ކުރީގެ ރައީސް އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، 20 ވަނަ ރައްޔިތުންގެ މަޖިލީހުގެ އިންތިޚާބުގައި އެމްޑީޕީގެ ޓިކެޓްގައި ވާދަކުރައްވާ، މުހައްމަދު ޝިނާން އަށް ތާއިދު ހޯއްދަވައި ދެއްވުމަށް، އެދާއިރާގެ ފޯކައިދޫއަށް ކުރެއްވި ޒިޔާރަތުގައި އެރަށުގެ ރައްޔިތުންނާއި ބައްދަލުކުރައްވައި ދެއްކެވި ވާހަކަފުޅުގައެވެ.

ރައީސް ޞާލިޙް ވިދާޅުވީ، ކޮމަންޑޫ ދާއިރާގެ ބައި އިލެކްޝަންގައި އެމްޑީޕީން ކުރި މަސައްކަތްތައް، އެދާއިރާގެ ގޮނޑިއަށް ވާދަކުރެއްވި، ކެންޑިޑޭޓަށްވެސް ރަނގަޅަށް އެނގިވަޑައިނުގަންނަވާނެ ކަމަށެވެ. 

ރައީސް ޞާލިޙް ވިދާޅުވީ، ދާއިރާގެ އެމްޑީޕީގެ ސަޕޯޓަރުންގެ އެދޭތީ، އެފަހަރު ބައެއް ޖަލްސާތަކުގައި ކެންޑިޑޭޓަށް ވާހަކަދެއްކުމަށް ފުރުޞަތު ނުދޭންވެސް ޖެހުނު ކަމަށެވެ. އަދި އެކެނޑިޑޭޓާއި އެކު އޭރު ކުރިޔަށް ދިޔައީ އެމްޑީޕީއަށް އެނިންމުން ނިންމިފައި އޮތީމާ ކަމަށްވެސް ރައީސް ޞާލިޙް ވިދާޅުވިއެވެ.

ރައީސް ސާލިޙް ވިދާޅުވީ، އެ ގޮނޑި އެމްޑީޕީއަށް ކާމިޔާބުކޮށްދިނުމަށްޓަކައި ބައެއް ބޭފުޅުން ހިތާއި ދެކޮޅަށްވެސް މަސައްކަތްޕުޅު ކުރެއްވިކަން އެމަނިކުފާނަށް އެނގިވަޑައިގަންނަވާ ކަމަށެވެ. އަދި ކޮމަންޑޫ ދާއިރާގެ ބައި އިލެކްޝަން ކާމިޔާބުކޮށް އެގޮނޑިއަށް ހޮވައިދިން މެމްބަރު އެމްޑީޕީ ދޫކޮށް ގޮސްފައިވާކަން ރައީސް ޞާލިޙް ހިތާމަޔާއި އެކު ފާހަގަކުރައްވިއެވެ.

ރައީސް ވިދާޅުވީ، ކުރީފަހަރު އެހެންވި ނަމަވެސް އެމަނިކުފާނުގެ ފުރިހަމަ ޔަޤީންކަން މިފަހަރުގެ ކެންޑިޑޭޓު ޝިނާން އާއި މެދު އެބައޮތް ކަމަށެވެ. އަދި ކޮމަންޑޫ ދާއިރާގެ ގޮނޑިއަށް ޝިނާނު ހޮއްވަވައި ދެއްވުމަށް ރައީސް ޞާލިހް އެދިވަޑައިގެންނެވިއެވެ. 

މިއަހަރުގެ ރައްޔިތުންގެ މަޖިލީހުގެ އިންތިޚާބު އޭޕްރީލް މަހުގެ 21 ވަނަ ދުވަހު ބޭއްވުމަށް ހަމަޖެހިފައިވާ އިރު، އިންތިޚާބުގެ ކެމްޕޭނަށް ކުރީގެ ރައީސް އިބްރާހިމް މުޙައްމަދު ޞާލިޙްވެސް ދަނީ އަތޮޅުތެރެއަށް ދަތުރުފުޅު ކުރައްވަމުންނެވެ.