ފުޓުބޯޅައިގެ ހުރިހާ ހަރަކާތަކުން ކްލަބް ވެލެންސިއާ ސަސްޕެންޑު ކުރުމަށް، ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)  އިން ނިންމައި، ބުރާސްފަތި ދުވަހު އެކަން އެ ކްލަބަށް އަންގައިފިއެވެ.

ކްލަބް ވެލެންސިއާ ސަސްޕެންޑުކުރި ސަބަބެއް ކަމުގައި އެފްއޭއެމްއިން ބުނެފައިވަނީ، އެ ކްލަބުގެ ބޯޑުން ހަސަން ވަހީދު (ދޮނާ) ވަކިކުރުމުގައި ގަވާއިދާއި ޚިލާފަށް އަމަލުކޮށްފައިވުމެވެ. މިހެންކަމުން، އެފްއޭމްއިން ކްލަބް ވެލެންސިއާ ސަސްޕެންޑު ކޮށްފައިވަނީ، އެ ކްލަބުގެ އާ ބޯޑު އިންތިހާބު ކުރެވެންދެން ކަމުގައި ބުނެފައިވެއެވެ.

ވެލެންސިއާގެ މައްސަލަތައް ބޮޑުވެފައިވަނީ، އެފްއޭއެމްގެ އިންތިހާބުގައި ވާދަކުރުމަށް ކުރިމަތިލި ދެ ކެނޑިޑޭޓުންގެ އަތުގައި ވެސް އެ ކްލަބުގެ ތާއީދު ސިޓީ އޮތުމުންނެވެ. އަދި ޖެނުއަރީ 31 ގައި ބޭއްވުމަށް މަސައްކަތްކުރި އެފްއޭއެމް އިންތިހާބު ފަސްކުރަން ޖެހުނު އެއް ސަބަބަކީ ވެސް މި މައްސަލަ ފެންމަތިވުމެވެ.

އޭރު އެފްއޭއެމް އިން ނިންމީ ވެލެންސިއާގެ ތާއިދު ސިޓީ ކެންސަލް ކުރުމަށެވެ. ފުރަތަމަ ޑިވިޝަނުގެ 3 ޓީމެއްގެ ތާއީދު ކޮންމެ ކެނޑިޑޭޓަކަށް އޮންނަން ޖެހޭއިރު، އެފްއޭއެމްއިން މިގޮތަށް ނިންމުމުން، އަހުމަދު ތޯރިގު (ޓޮމް) ގެ ކެނޑިޑެންސީ ބާތިލްވިއެވެ. އެ މައްސަލަ ތޯރިގު އެޕީލް ކުރިއިރު، އިލެކްޓޯރަލް ކޯޑުގައިވާ ގޮތަށް އިލެކްޓޯރިއަލް ކޮމިޓީ އާއި އިލެކްޓޯރިއަލް އެޕީލް ކޮމިޓީ އުފައްދާފައިނުވާތީ، ފީފާ އާއި އޭއެފްސީން އެންގީ އިންތިހާބު ކެންސަލްކުރުމަށެވެ.

ނަމަވެސް ފީފާ އާއި އޭއެފްސީގެ ލަފާގެ މަތިން، އެފްއޭއެމްގެ އެކްސްޓްރާ އޯޑިނަރީ ކޮންގްރެސް އެއް ބާއްވައި، އެ އެސޯސިއޭޝަންގެ ކޮމެޓީތައް ވަނީ މިހާރު އެކުލަވާލާފައެވެ. މި ކޮންގްރެސްގައި ވެލެންސިއާ ބައިވެރިވެފައެއް ނުވެއެވެ.