ހުޅުމާލޭގައި އިމާރާތްކުރި ދެވަނަ މިސްކިތް ހުޅުވައިފިއެވެ.

މިމިސްކިތަކީ، އަމިއްލަ ފަރާތަކުން އިމާރާތްކޮށްފައިވާ މިސްކިތެކެވެ. މިއަދުގެ ހުކުރު ނަމާދު ވަގުތަށް މިމިސްކިތް ހުޅުއްވައި ދެއްވީ މިނިސްޓަރ އޮފް އިސްލާމިކް އެފެއާޒް ޑރ. މުޙައްމަދު ޝަހީމް ޢަލީ ސައީދެވެ.

މިސްކިތް ހުޅުއްވައި ދެއްވުމަށްފަހު އިސްލާމިކް މިނިސްޓަރ ޑރ. މުޙައްމަދު ޝަހީމް ޢަލީ ސައީދު ވަނީ، މިސްކިތްތައް ސާފުތާހިރު ކަމާއި އެކު ބެލެހެއްޓުމުގެ މުހިއްމު ކަމުގެ މައްޗަށް އަލިއަޅުއްވާލައްވައި ވާހަކަފުޅު ދައްކަވާފައެވެ.

މިއަދު ހުުޅުވި، މި މިސްކިތަށް ދީފައިނަމަކީ، "މަސްޖިދުލް ޙަސަން އާދަމް" އެވެ.

އިސްލާމީ އާޓްގެ ފަރުމާތަކާއި، ފަންނުވެރިކަން ފެނިގެންދާ މި މިސްކިތަކީ، މިޒަމާނުގެ ފެންވަރަށް ބިނާކޮށްފައިވާ ވަރަށް ފުރިހަމަ މިސްކިތެކެވެ. މިނިސްޓްރީ އޮފް އިސްލާމިކް އެފެއާޒުން ހާމަކޮށްފައިވާ ގޮތުގައި، ދެބުރިއަށް ޢިމާރާތްކޮށްފައިވާ މި މިސްކިތުގައި، ދަތިނުވެ 1500 މީހުންނަށް އެއްފަހަރާ ނަމާދު ކުރެވޭނެއެވެ. އަދި މިމިސްކިތުގައި އަންހެނުންނަށް ނަމާދު ކުރުމަށް ޚާއްޞަ ބަޔަކާއި އިސްކުރުބަރިއެއްވެސް ހަދާފައި ވެއެވެ.

ހުޅުމާލެ ފޭސް 2ގައި ހުޅުވުނު އެންމެ ފުރަތަމަ ދާއިމީ މިސްކިތަކީ، މަސްޖިދު ޢަމީލް ޖަލީލު އެވެ. 

ހުޅުމާލެ ފޭސް 2 ގައި ދާއިމީ އިތުރު މިސްކިތްތައް ބިނާކުރުމަށްޓަކައި މިހާރުވެސް، 4 ފަރާތަކަށް ވަނީ ބިން ދޫކޮށްފައެވެ.