އެމެރިކާގެ އިންޓަ މިއާމީއަށް ބަދަލުވިފަހުން އާޖެންޓީނާގެ ތަރި ލިއޮނެލް މެސީގެ ހަށިފާރަވެރިއެއްގެ ގޮތުގައި މަސައްކަތް ކުރަމުން އަންނަނީ އާދައިގެ މީހެއް ނޫނެވެ. ޔާސިން ޗެއުކޯ ނަމަކަށް ކިޔާ މި މީހާއަކީ އެމެރިކާގެ ނޭވީ ސީލްއެކެވެ. 

އެމެރިކާގެ ނޭވީ ސީލް އޮފިސަރުންނަކީ މިލިޓަރީގެ ހާއްސަ ތަމްރީނުތަކެއް ދީފައިވާ ބައެކެވެ. މި މީހުންނަކީ، މޫދާއި އެއްގަމު އޮޕަރޭޝަންތަކުގަ އާއި އިންޓެލިޖެންސް މައުލޫމާތު ހޯދުމަށް ދުޝްމަނުންގެ ތެރޭގައި ވިޔަސް މަސައްކަތްކުރުމަށް ފަސް ޖެހޭނެ ބައެއް ނޫނެވެ. 

އެމެރިކާގެ މިލިޓަރީގައި ޗެއުކޯ މަސައްކަތްކުރިއިރު އޭނާވަނީ އިރާން އާއި އަފްގާނިސްތާނުގައި އެކިއެކި މިލިޓަރީ އޮޕަރޭޝަންތަކުގައި މަސައްކަތްކޮށްފައެވެ. އެހެންކަމުން މިވަރުގެ ޝަހުސިއްޔަތަކާއެކީ ޗެއުކޯގެ އަގު ވެސް އުޅޭނީ މަތީގައި ނޫންހެއްޔެވެ.

Advertisement

ޗެއުކޯއަކީ މިކްސްޑް މާޝިއަލް އާޓްސް (އެމްއެމްއޭ) ގެ ވެސް ތަޖުރިބާހުރި މީހެއްކަމުން، މީނާގެ މި ހުނަރުތަކަކީ ދުނިޔޭގެ އެންމެ މަޝްހޫރު އެތުލީޓު ރައްކާތެރި ކުރުމަށް އެންމެ އެކަށޭނަ ހުނަރުތަކެކެވެ. އިންސްޓަގްރާމުގައި އޭނާ ޕޯސްޓުކޮށްފައި ހުރި ވީޑިއޯތަކުން ވެސް އޭނާގެ ހަށިގަނޑު މި މަސައްކަތަށް ތައްޔާރުކޮށްފައިވާ މިންވަރު އެނގެއެވެ.

އިންސްޓަގްރާމުން 328،000 މީހުން އޭނާ ފޮލޯ ކުރާއިރު، މިހުރިހާ އެންމެންނަކީ މެސީގެ ފުށުން، ނުވަތަ މެސީއާއެކު މަސައްކަތްކުރާތީ ލިބުނު ފޮލޯވަރުން ތަކެއްކަމަކަށް ގިނަ ބަޔަކު ގަބޫލެއް ނުކުރެއެވެ. ގިނަ ބަޔަކު ގަބޫލުކުރާ ގޮތުގައި، އޭނާގެ "ފޭން ބޭސް" އެއް އުފެދެމުން އަންނަ ސަބަބަކީ، އޭނާ ހަށިގަނޑު ބައްޓަން ކުރުމަށް ކުރާ މަސައްކަތްތަކާއި، ވޯކްއައުޓަށްފަހު ގިނަ ފޮޓޯތަކެއް އިންސްޓަގްރާމްގައި ހިއްސާކުރަމުންދާތީއެވެ. 

ރިޕޯޓުތައް ބުނާގޮތުން އޭނާގެ މުސާރައަކީ މަހަކު 250,000$ (ދެލައްކަ ފަންސާސްހާސް ޑޮލަރު)އެވެ. އެއީ އަހަރަކަށް 3,000,000$ (3 މިލިއަން) ޑޮލަރެވެ. މި މުސާރައާއެކު، މެސީގެ އިތުރުން އޭނާގެ އަންހެނުން އެންޓޮނޭލާ ރޮކޫޒޯ އަދި އޭނާގެ ދަރިން ކަމުގައިވާ ތިއާގޯ، މަޓެއޯ އަދި ކެއިރޯގެ ސެކިއުރިޓީ ބެލެހެއްޓުން ހިމެނެއެވެ.

ސީނިއަރ ކެރިއަރުގެ ފުރަތަމަ މެޗުން ފެށިގެން މެސީ ހޯދަމުން އަންނަ ސަމާލުކަން އިންޓަމިއާމީގައި ވެސް ލިބެމުން ދާއިރު، އޭނާގެ ބޮޑީގާޑު ޗެއުކޯ ވެސް މި އަންނަނީ އަމިއްލަ މަޝްހޫރުކަމެއް ހޯދަމުންނެވެ.