މިއަހަރު ބާއްވާ ރައްޔިތުންގެ މަޖިލީހުގެ އިންތިޚާބުގައި އެމްޑީޕީގެ ޓިކެޓްގައި ރައްޔިތުންގެ މަޖިލީހުގެ ފަރެސް މާތޮޑާ ދާއިރާގެ ކެންޑިޑޭޓް، އަޙްމަދު ޒައީމްގެ ގަޔަށް ކަޅުތެޔި ޖަހައި ދިން ހަމަލާ އެމްޑީޕީން ކުއްވެރިކޮށްފިއެވެ.

އެމްޑީޕީން ބުނެފައި ވަނީ އެއަމަލަކީ ވަރަށް ދަށުދަރަޖައިގެ ފިނޑިއަމަލެއް ކަަމަށާއި އެކަން އެޕާޓިން ކުއްވެރިކުރާ ކަމަށެވެ.

ފަރެސް މާތޮޑާ ދާއިރާގެ އެމްޑީޕީ ކެންޑިޑޭޓް، އަޙްމަދު ޒައީމްގެ ގަޔަށް ބަޔަކު ކަޅުތެޔޮ ޖަހާފައި ވަނީ، ދައުލަތުގެ މީޑިއާއިން އިންތިޒާމްކޮށްގެން ބާއްވަމުން އަންނަ ރައްޔިތުންގެ މަޖިލީހުގެ ބަހުސްގައި ބައިވެރިވެވަޑައިގެންނެވުމަށް ތައްޔާރުވެވަޑައިގެން، ބަހުސަށް ޓީވީ ބިލްޑިންގއަށް ދިޔަ މަގުމަތީގައެވެ. 

އެމްޑީޕީ ކެންޑިޑޭޓް، އަޙްމަދު ޒައީމްގެ ގަޔަށް ކަޅުތެޔޮޖެހުން ކުއްވެރިކުރައްވައި، އެމްޑީޕީގެ ރައީސް ޢަބުދުﷲ ޝާހިދުވެސް ވަނީ އެމައްސަލަ ބެލުމަށް ކަމާބެހޭ ފަރާތްތަކަށް ވަނީ ގޮވާލައްވާފައެވެ.

ރައްޔިތުންގެ މަޖިލީހުގެ ފަރެސްމާތޮޑާގެ ގޮނޑި އެންމެ ފަހުން ފުރުއްވާފައި ވަނީ، ރައީސުލްޖުމްހޫރިއްޔާގެ ނައިބު ޙުސައިން މުހައްމަދު ލަޠީފެވެ. އެމަނިކުފާނު އެގޮނޑިން އިސްތިއުފާ ދެއްވީ، 2023 ވަނަ އަހަރު ބޭއްވި ރިޔާސީ އިންތިޚާބުގައި ރައީސުލްޖުމްހޫރިއްޔާގެ ނައިބުގެ މަޤާމަށް އެމަނިކުފާނު އިންތިޚާބުވެވަޑައިގެންނެވުމާއި ގުޅިގެންނެވެ.