ދުނިޔޭގެ އެންމެ ބޮޑު ސޯޝަލް މީޑިއާ ޕްލެޓްފޯމް، ފޭސްބުކަށް ލޮގިން ނުވެވިގެން ވަރަށް ގިނަ ގައުމުތަކުން ރިޕޯޓުކުރަން ފަށައިފިއެވެ.

ގިނަ ބަޔަކު ރިޕޯޓުކޮށްފައިވާ ގޮތުގައި، ފޭސްބުކް އެޕްލިކޭޝަނަށް ވަނުމުން، "ސެޝަން އެކްސްޕަޔާޑް" ކަމަށް އަރާފައި ދެން ދަނީ ލޮގިންވުމަށެވެ. ބައެއް މީހުނަށް ލޮގިން ވެވުނަސް، ކޮންޓެންޓު ލޯޑުވުމުގައި ވަނީ މައްސަލަތައް ކުރިމަތިވެފައެވެ. ރާއްޖޭގައި ފޭސްބުކް ބޭނުންކުރާ ގިނަ ބަޔަކަށް ވެސް މިކަން ތަޖުރިބާ ކުރެވިފައިވަނީ އެ ގޮތަށެވެ.

"ޑައުންޑިޓެކްޓަރ" އިން ފާހަގަކޮށްފައިވާ ގޮތުގައި، ދުނިޔޭގެ އެކިކަންކޮޅުތަކުން މި މައްސަލަ ރިޕޯޓުކުރަން ފަށާފައިވަނީ ރާއްޖެ ގަޑިން 7:58 ގައެވެ. "ޑައުންޑިޓެކްޓަރ" އަކީ އިންޓަނެޓް، ސޯޝަލް މީޑިއާ، ވެބް ހޯސްޓިން ޕްލެޓްފޯމް، ބޭންކް، ގޭމް، މުނިފޫހިފިލުވުން، އަދި އެހެނިހެން މުހިންމު ހިދުމަތްތަކަށް ދިމާވާ ބުރޫއެރުންތައް ދެނެގަތުމަށް އެހީތެރިވެދޭ ވެބްސައިޓެކެވެ.

Advertisement

ފޭސްބުކްގެ އިތުރުން މެޓާ ޕްލެޓްފޯމުގައި ހިމެނޭ އިންސްޓްގާރާމާއި މެސެންޖާ ބޭނުންކުރުމަށް ވެސް ވަނީ ބުރޫއަރާފައެވެ. 

މިކަމުގެ ސަބަބެއް އަދި މެޓަ ސަޕޯޓު ޓީމުން ހާމައެއް ނުކުރެއެވެ.