މާލޭގައި ބޭރަށް ހިންގުމާއި ހޮޑުލުން އިތުރުވެފައިވާތީ މިކަމަށް ސަމާލުވުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.

އެޗްޕީއޭ އިން އާންމުކޮށްފައިވާ ތަފާސްހިސާބުތަކަށް ބަލާއިރު، މިދިޔަ މަހުގެ ދޭކުން ފެށިގެން މިދިޔަ ހޮނިހިރު ދުވަހުގެ ނިޔަލަށް 3،075 ކޭސް ރިޕޯޓު ކޮށްފައިވެއެވެ.

ބޭރަށް ހިންގުމުގެ ބަލި އިތުރުވެފައިވާތީ، އެޗްޕީއޭ އިން ކުރި ޓްވީޓެއްގައި ވަނީ އެ އަލާމާތްތައް ފެންނަ ނަމަ ޑޮކްޓަރަށް ދެއްކުމަށް އިލްތިމާސް ކޮށްފައެވެ.

ބޭރަށް ހިންގުމާއި ހޮޑުލުމުގެ އަލާމާތްތައް:

- ބޯ އެނބުރުން

- ކުޑަކަމުދެވޭ ވަރު މަދުވުން

- ހޮޑު ނުވަތަ ބޮޑުކަމުދާ ވަގުތު އޭގައި ލޭގެ އަސަރު ހުރުން

- އާދަޔާ ހިލާފަށް ކަރު ހިއްކުން

- މީހާ މާބޮޑަށް ވަރުބަލިވުން

- ދިޔާތަކެތި ބޭނުން ނުކުރެވުން

- ބަނޑުގައި ރިއްސުން

ބޭރަށް ހިންގާނަމަ ގިނަގިނައިން ލޮނު ޕެކެޓް، ފެން، ސޫޕް ފަދަ ދިޔާތަކެތި ބޭނުންކުރުމަށް ވަނީ އިލްތިމާސްކޮށްފައެވެ. ފާހާނާ ކުރުމަށް ފަހު އަދި ކާބޯތަކެތި ތައްޔާރު ކުރުމުގެ ކުރިން ސައިބޯނި ލައިގެން ރަނގަޅަށް އަތްދޮވުމާއި، ފާހަނާ ބޭނުން ކުރުމަށްފަހު ރަނގަޅަށް ސެނެޓައިޒް ކުރުން ހިމެނެއެވެ.