އިންދިރާ ޕްރޮޖެކްޓްގެ ދަށުުން ރާއްޖޭގެ 61 ރަށެއްގައި ޕޮލިސް ސްޓޭޝަންތައް އެޅުމުގެ ޕްރޮޖެކްޓަށް ވީގޮތެއް ނޭނގިގެން އެމައްސަލަ ފުލުހުން ތަޙްޤީޤު ކުރަން ފަށާފައިވާ ކަމުގައި ދިވެހި ފުލުހުންގެ ޚިދުމަތުން ވިދާޅުވެއްޖެއެވެ.

ހޯމް މިނިސްޓްރީގެ ފަރާތުން މިއަދު އިސްކަންދަރު ކޮށީގައި ބޭއްވި ނޫސްވެރިންގެ ބައްދަލުވުމުގައި، ޑެޕިއުޓީ ކޮމިޝަނަރ އޮފް ޕޮލިސް އިސްމާއީލް ނަވީން ވިދާޅުވީ، އިންދިރާ ޕްރޮޖެކްޓްގެ މައްސަލަ ފުލުހުން ބަލަން ފަށާފައިވަނީ، ހޯމް މިނިސްޓްރީގެ އެންގުމަށް ކަމަށެވެ.

އެޕްރޮޖެކްޓްގެ މަސައްކަތްތައް ކުރިޔަށް ދިޔަ ގޮތާއި ގުޅޭ ގޮތުން ހޯމް މިނިސްޓަރ ޢަލީ އިހްސާން ވަނީ މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވާފައެވެ. މިނިސްޓަރ އިހްސާން ވިދާޅުވީ އެޕްރޮޖެކްޓާއި ގުޅޭ ކުންފުންޏާއި ގުޅޭނެ ގޮތެއް އެނގިވަޑައި ނުގަންނަވާ ކަމަށާއި އެހެން ނަމަވެސް އެޕްރޮޖެކްޓްގެ ކަންކަން ހިނގައި ދިޔަ ގޮތް ބައްލަވަމުން ގެންދަވާ ކަމަށެވެ.

މިނިސްޓަރ ވިދާޅުވީ، އިންދިރާ ޕްރޮޖެކްޓްގެ ދަށުން ރާއްޖޭގެ 61 ރަށެއްގައި ޕޮލިސް ސްޓޭޝަންތައް އެޅުމުގެ ޕްރޮޖެކްޓާއި ގުޅޭ ގޮތުން ރަށްރަށުގެ ކައުންސިލްތަކުންވެސް މިނިސްޓްރީއާ ސުވާލު ކުރަމުންދާ ކަމަށެވެ.

ހޯމް މިނިސްޓަރ ޢަލީ އިހްސާން ވިދާޅުވީ، އެޕްރޮޖެކްޓަށް ވީ ކިހިނެއްތޯ ބައްލަވާލެއްވި ކަމަށެވެ. މިގޮތުން 2019 އޮގަސްޓް 26 ވަނަ ދުވަހު، 61 ޕޮލިސް ސްޓޭޝަނެއް ރާއްޖޭގައި އެޅުމަށްޓަކައި 41.18 މިލިޔަން ޔޫއެސް ޑޮލަރު ޕްރޮޖެކްޓެއް ރާއްޖޭގައި ހިންގުމަށް، އިންދިރާ ޕްރޮޖެކްޓްސް އެންޑް ޑިވެލޮޕްމެންޓްސް ކިޔާ ކުންފުންޏަކުން، ޝައުޤުވެރިކަން ފާޅުކޮށް ދިވެހި ސަރުކާރަށް ހުށައަޅާފައިވާ ކަމަށެވެ. 

މިގޮތުން އެޕްރޮޖެކްޓް ހިންގުމަށް ބޭނުންވާ ފައިސާގެ 85 އިންސައްތަ އިންޑިއާގެ އެގްޒިމް ބޭންކް މެދުވެރިކޮށް ހޯދުމަށާއި، އަދި ދިވެހި ސަރުކާރުން 15 އިންސައްތަ ދިނުމަށް އެކުންފުނިން ހުށައަޅާފައިވާ ކަމަށެވެ. އަދި އެޕްރޮޖެކްޓްގެ ޕްރޮޕޯޒަލްއާއި އެގްރީމެންޓް ހެދުމަށް ފަހުގައި، 12 އޮކްޓޫބަރު 2022ގައި، އޭބީއެލް އިންދިރާ ޕްރޮޖެކްޓްސް ކިޔާ ޕާޓްނަރ ޝިޕަކަށް ބަދަލުކޮށް ރާއްޖޭގައި ރަޖިސްޓްރީކޮށްފައިވާ  ކަމަށެވެ. އޭގެ ފަހުން ސަރުކާރުން މުއާމަލާތު ކުރަން ފަށާފައި ވަނީ އެޖޮއިންޓް ވެންޗަރ ކުންފުންޏާއި ކަމަށާއި އޭރުވެސް އެއްވެސް ފައިސާއެއް އިންޑިއާގެ އެގްޒިމް ބޭންކުން ދިވެހި ދައުލަތަށް ނުލިބޭ ކަމަށާއި، އެހެން ނަމަވެސް 7 މާރިޗު 2023ގައި ދިވެހި ސަރުކާރުން އެކުންފުންޏަށް 3.6 މިލިއަންް ޑޮލަރު ދެއްކި ކަމުގައި ހޯމް މިނިސްޓަރ އިހްސާން ވިދާޅުވިއެވެ. 

ހޯމް މިނިސްޓަރ އިހްސާން ވިދާޅުވީ، އެކުންފުންޏަކީ، ރާއްޖެއިން ބޭރު ފައިސާ ގެނެސް ރާއްޖޭގައި 61 ޕޮލިސް ސްޓޭޝަން އެޅުމަށް ޝައުޤުވެރިކަން ފާޅު ކުރި ކުންފުންޏެއް ނަމަވެސް އެކުންފުންޏަށް ފުރަތަމަ ފައިސާ ދީފައި ވަނީ ދިވެހި ސަރުކާރުންކަމަށެވެ. ސަރުކާރުން އެފައިސާ ދިނުމަށްފަހުގައިވެސް އެއްވެސް ޕޮލިސް ސްޓޭޝަނެއް އެޅުމުގެ އަމަލީ އެއްވެސް މަސައްކަތެއް ހިނގާފައި ނުވާކަމުގައިވެސް ހޯމް މިނިސްޓަރ އިހްސާން ފާހަގަކުރެއްވިއެވެ.

ހޯމް މިނިސްޓަރ އިހްސާން ވިދާޅުވީ، 13 އޭޕްރީލް 2023ގައި، އިންޑިއާގެ އެގްޒިމްބޭންކުގެ ފައިނޭންސް ހަމަ ނުޖެހުނުކަމުގައި، އިންދިރާ ޕްރޮޖެކްޓްސް ކުންފުނިން ރާއްޖެއަަށް އަންގާފައިވާ ކަމަށެވެ. އޭރު ދިވެހި ސަރުކާރުން އޮތީ އެކުންފުންޏަށް، 3.6 މިލިއަން ޑޮލަރު އެކުންފުންޏަށް ދީފައި ކަމަށާއި އޭގެ ފަހުން ކުރެވުނު މުއާމަލާތްތަކަށް ބަލާއިރުވެސް އެފައިސާއަށް ވީގޮތެއް ނޭނގޭ ކަމުގައި މިނިސްޓަރ އިހްސާން ވިދާޅުވިއެވެ. އަދި 20 ޖެނުއަރީ 2024ގައި އިންދިރާ ޕްރޮޖެކްޓް ހިންގުމަށް ހެދި ޖޮއިންޓްވެންޗަރ ކުންފުނި ރޫޅިފައިވާ ކަމަށް، އިންދިރާ ޕްރޮޖެކްޓްސް އެންޑް ޑިވެލޮޕްމެންޓްސްއިން ސަރުކާރަށް އަންގާފައިވާކަމަށެވެ. 

މީގެ އިތުރުން މިނިސްޓަރ އިހްސާން ވިދާޅުވީ، 13 އޮގަސްޓް 2023ގައި އިންޑިއާ ސަރުކާރުން ވަނީ، އިންދިރާ ޕްރޮޖެކްޓްގެ ދަށުން، 61 ޕޮލިސް ސްޓޭޝަން އެޅުމަށް، ހިލޭ އެހީގެ ގޮތުގައި 5 މިލިއަން ޑޮލަރު ދޭނެކަން އަންގާފައިވާ ކަމަށެވެ. އެހެންވެ ކުރިން ސަރުކާރުން އެޑްވާންސަށް ދިން 3.6 މިލިއަން ޑޮލަރަކީ، އިންޑިއާ ސަރުކާރުންދޭ ހިލޭ އެހީގެ ދަށުން ދެވުނު ފައިސާ ކަމުގައި ބަލައިގެން ޕްރޮޖެކްޓް ކުރިޔަށް ގެންދިޔުމަށް ފިނޭންސް މިނިސްޓްރީން ފުލުހުންގެ އިދާރާއަށް އެންގެވި ކަމުގައިވެސް މިނިސްޓަރ އިޙްސާން ވިދާޅުވިއެވެ.

މިނިސްޓަރ އިހްސާން ވިދާޅުވީ އެޕްރޮޖެކްޓްގެ ކަންކަން ހިނގައި ދިޔަގޮތް ތަޙްޤީޤު ކުރުމަށް ފުލުހުންނަށް އެންގެވީ ދައުލަތުގެ 55 މިލިއަން ރުފިޔާ، ކޮންމެވެސް ކުންފުންޏަކަށް ދޫކުރެވި އެފައިސާއަށް ވީނުވީ ގޮތެއް ނޭނގޭތީ ކަމަށެވެ.

އަދި އެ 61 ޕޮލިސް ސްޓޭޝަންތައް އެޅޭނެ އެއްވެސް މަގެއް ފެނޭތޯ މަސައްކަތް ކުރައްވާނެ ކަމުގައިވެސް މިނިސްޓަރ އިހްސާން ވިދާޅުވިއެވެ.