ޤަވާއިދާއި ޚިލާފަށް ޕާކުކޮށްފައިވާ އުޅަނދުތަކާއި، މަގުތަކުގައި ގިނަ ދުވަސްވެފައި ހުރި ބައު އުޅަނދު ފަހަރު ފުލުހުން ނަގަންފަށައިފިއެވެ.

ފުލުހުންގެ އިދާރާއިން ވިދާޅުވީ، މަގު ބޭނުންކުރާ ފަރާތްތަކަށް ދަތިވާގޮތަށް ގަވާއިދާ ހިލާފަށް ޕާކުކޮށްފައި ހުރި އުޅަނދުތަކާއި ގިނަ ދުވަސް ވެފައިހުރި އުޅަނދުތައް ނެގުމުގެ މަސައްކަތް މިއަދު ވަނީ ފަށާފައެވެ.

ފުލުހުންގެ އިދާރާއިން ވިދާޅުވީ، މަގުތައް ތަރުތީބުކޮށް ބޭއްވުމުގައި އެންމެންގެ އެއްބާރުލުން މުހިންމު ކަމަށެވެ.

ފުލުހުންގެ މިމަހުގެ ތިންވަނަ ދުވަހު ނެރުނު ނޫސްބަޔާނުގައި މިމަސައްކަތް ބުރާސްފަތި ދުވަހުން ފެށިގެން ކުރިއަށް ގެންދާނެ ކަމުގައި ހާމަކޮށްފައި ވީނަމަވެސް، މިއަދު އެމަސައްކަތް ފަށާފައި ވާކަމުގައި ޑެޕިއުޓީ ކޮމިޝަނަރ އޮފް ޕޮލިސް އިސްމާއީލް ނަވީން ވިދާޅުވެފައެވެ.

މިއަދު ބޭއްވި ނޫސްވެރިންގެ ބައްދަލުވުމުގައި ނަވީން ވިދާޅުވީ، ފުލުހުން އެމަސައްކަތް ފެށިއިރު، ފާއިތުވި ހަފްތާގައި މާލޭގައި ހިނގި ބައެއް އަލިފާނުގެ ހާދިސާގައި އަލިފާން ނިވުމަށް ބޭނުންކުރާ އުޅަނދުތަކާއި، އަދި އެމްބިއުލާސްފަދަ އުޅަނދުތައް ދުއްވުމަށްވެސް ވަރަށް ބޮޑަށް ދަތިވެގެން ދިޔަކަން ފާހަގަ ކުރެވުނު ކަމަށެވެ.

ޓްރެފިކް ވަޔަލޭޝަން ސްޓިކާ ނުޖަހާ ގޮތަށް ހަމަޖައްސައި ދޫކޮށްލުމާއި އެކު މާލޭގައި ޕާކްކުރުމުގެ މައްސަލަ ވަނީ ބޮއްސުންލައިގެން ގޮސްފައެވެ.