ޔުނައިޓެޑް ނޭޝަންސް ރިލީފް އެންޑް ވޯކްސް އެޖެންސީ ފޯ ފަލަސްތީން ރެފިއުޖީސް (ޔޫ. އެން. އާރު. ޑަބްލިޔު. އޭ.) ގައި ފޮޓޯ ގްރާފަރެއްގެ ގޮތުގައި މަސައްކަތްކުރާ ހުސެއިން ޖާބިރު، އޭނާގެ ހަތަރު އަހަރުގެ އަންހެން ދަރިފުޅު އޭނާގެ ލޯ ކުރިމަތީގައި އިސްރޭލު ސިފައިން މަރާލި ގޮތް އަލްޖަޒީރާއަށް ކިޔައިދީފިއެވެ.

އެއީ މިދިޔަ އަހަރުގެ ޑިސެމްބަރު މަހުގެ 5 ވަނަ ދުވަހުއެވެ. ޖާބިރުގެ ހަތަރު އަހަރުގެ ސަލްމާ އަބަދުގެ އަބަދަށް ވަކިވެގެން ދިޔައީ ސަލާމަތީ އައްސޭރިއަކަށް އޭނާގެ އާއިލާ ބަދަލުކުރަން އުޅުމުގެ ތެރޭގައެވެ. އެ ހަމަލާގައި ޖާބިރަށް ލިބުނު އަނިޔާގެ ސަބަބުން އޭނާގެ އަތުގައި ބޭސް އަޅާ، ބޭރުން ފެންނާނޭހެން ބޯލްޓު ޖަހާފައި ހުއްޓެވެ.

ޖާބިރުގެ އާއިލާ ދިރިއުޅެމުން ދިޔަ އިމާރާތް ހިމެނޭ ސަރަހައްދުގައި ހުރި ގިނަ ގެ ތަކަކުން، ސިފައިންގެ އެންގުމަށް އެރޭ މީހުން ބަދަލުވުމުގެ މަސައްކަތުގައި ހެލިފެލިވެ އުޅުނެވެ. އޭރު ޖާބިރުގެ އާއިލާ ރައްކާތެރިކަން ހޯދުމަށް އެކުވެރިންތަކަކާއެކު އެހެން އިމާރާތެއްގައި ތިބޭތާ 4 ދުވަހެވެ. ގެޔަށް ނައިސް މަސައްކަތުގައި އުޅުމަށްފަހު ޖާބިރު އެރޭ އައީ އާއިލާ ބަދަލު ކުރުމަށެވެ. ނޫނިއްޔާ އޭނާގެ ސަލްމާ ޝާހީދުކޮށްލާތަން އޭނާއަށް ފެންނަންވެގެނޭ ވެސް ބުނެވިދާނެއެވެ.

Advertisement

ޖާބިރު އިތުރަށް ކިޔައިދިން ގޮތުގައި، އިޒްރޭލު ސިފައިން އެ ދިމާލަށް ބަޑި ޖެހިއިރު، އެ ތާނގައި ކުޑަކުދިންނާއި އަންހެނުން ތިބިކަން ސާފުކޮށް އެނގޭނެއެވެ. އަދި އެމީހުން ބަދަލުވުމަށް މަސައްކަތް ކުރަމުން ދިޔައީ އިޒްރޭލު ސިފައިންގެ ލަފާގެ މަތިންކަމަށާއި، އިޒްރޭލު ސިފައިންނަށް ނުރައްކާވާ އެއްވެސް ކަމެއް ނުކުރާކަމަށް ވެސް ބުންޏެވެ. 

އޭނާގެ ކުޑަ ދަރިފުޅު، އުމަރަށް ކަންތައްތައް ވީ ގޮތް މާރަނގަޅަށް ނޭންގޭއިރު، އޮމަރު އަދި ވެސް ސަލްމާގެ ވާހަކަ އަހާކަމަށް ޖާބިރު ބުނެފައިވެއެވެ. 

އެމެރިކާއިން މިދިޔަ ހަފްތާގައި އަންދާޒާ ކޮށްފައިވާ ގޮތުގައި 25،000 އަންހެނުންނާއި ކުޑަކުދިން މިހާތަނަށް އިޒްރޭލު ސިފައިން މަރާލާފައިވެއެވެ.