Advertisement
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު --
މިފަހަރު ރޯދަމަހު ކަރަންޓާއި ފެނަށް ބިލްކުރާނީ އާއްމު މަސްތަކުގައި ހުންނަ ވަރަށް: ރައީސް
ރޯދަމަހަކީ، އާއްމު ގޭބިސީތަކުގައި ކަރަންޓާއި ފެން ބޭނުންކުރާ މިންވަރު އިތުރުވެ، ބިލްތައް ބޮޑުވެގެންދާ މަހެއް ކަމަށްވީ ނަމަވެސް މިފަހަރުގެ ރޯދަމަހު، އާއްމު މަސްމަހުގައި ބިލްތައް ހުންނަ މިންވަރަށް ވުރެ ބޮޑުވެގެން ނުދާނެ ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ، އަތޮޅުތެރެއަށް މިހާރު އެމަނިކުފާނު ކުރައްވަމުންގެންދަވާ ދަތުރުފުޅުގައި، ރޭ ބ. އޭދަފުށީ ރައްޔިތުންނާއި ބައްދަލުކުރައްވައި ދެއްކެވި ވާހަކަފުޅުގައެވެ.
މިފަހަރުގެ ރަމަޟާން މަސްވެސް ދިމާވަނީ އަހަރުގެ ތެރޭގައި އަންނަ އެންމެ ހޫނު ދުވަސްވަރަށް ވުމާއި އެކު، އާއްމު ގޭބިސީތަކުން ކަރަންޓާއި ފެނަށް ކުރަންޖެހޭ ހޭދަ ބޮޑުވެގެން ދެއެވެ. އަދި ކަރަންޓް ބޭނުންކުރާ މިންވަރު އިތުރުވާތީ، އެކަމަށް ދުރާލައި ތައްޔާރުވުމުގެ މަސައްކަތް ކުރަމުން އަންނަ ކަމުގައިވެސް ސްޓެލްކޯއިން ވަނީ ބުނެފައެވެ.
އޭދަފުށީ ރައްޔިތުންނާއި ބައްދަލުކުރައްވައި ދެއްކެވި ވާހަކަފުޅުގައި ރައީސުލްޖުމްހޫރިއްޔާ ވިދާޅުވީ، ރަމަޟާންމަހު ކަރަންޓް ބިލާއި ފެންްބިލް ހުންނާނީ އާއްމު މަހެއްގައިވެސް ހުންނަ ވަރަށް ކަމަށެވެ.
ރައީސުލްޖުމްހޫރިއްޔާ ވިދާޅުވީ، އެކަން އެގޮތަށް ކުރުމަށް ފެނަކަ ކޯޕަރޭޝަނާއި، ސްޓެލްކޯއަށް އަދި އެމްޑަބުލިޔުއެސްސީއަށް އަންގާފައި ވާކަމަށެވެ. އަދި އެގޮތަށް ހަމަޖައްސާނެ ކަމުގެ ޔަޤީންކަން އެތިން ކުންފުނީގެ ވެރިންވެސް ދެއްވާފައިވާ ކަމުގައި ރައީސުލްޖުމްހޫރިއްޔާ ވިދާޅުވިއެވެ.
ރައީސުލްޖުމްހޫރިއްޔާ ވިދާޅުވީ، އިތުރަށް ލޯޑު ބޮޑުވިޔަސް ރައްޔިތުންގެ އަތުން އިތުރަށް އެއްޗެއް ނުނަންގަވާނެ ކަމަށެވެ. އަދި އެއީވެސް ރައްޔިތުންނަށް ލުޔެއް ދޭންވެގެން ކަމުގައި އެމަނިކުފާނު ވިދާޅުވިއެވެ. މީގެ އިތުރުން ސްޓެލްކޯއިން ފެނުގެ ޚިދުމަތް ދެމުން އަންނަ ރަށްރަށުގައި، ފެނުގެ ކަނެކްޝަން ފީގެ ގޮތުގައި ކޮންމެ މަހަކު ނަގަމުން އަންނަ -/30ރ ގެ ފީވެސް އަންނަމަހުން ފެށިގެން ނުނަގާނެ ކަމުގައި ރައީސް ވިދާޅުވިއެވެ.
ޔޫޓިލިޓީ ކުންފުނިތަކުގެ ރެކޯޑްތަކަށް ބަލާއިރު، އާއްމުކޮށް ރޯދަމަހު، ފެނާއި ކަރަންޓް ބޭނުންކުރާ މިންވަރު އެތައް ގުނައަކަށް އިތުރުވެގެންދެއެވެ. އެކަމުގެ ސަބަބުން ކަރަންޓާއި ފެން އުފެއްދުމަށް ޔޫޓިިލިޓީ ކުންފުނިތަކުން ކުރަންޖެހޭ ހޭދަވެސް އެތައް ގުނައަކަށް އިތުރުވެގެންދާއިރު، ކުންފުނިތަކަށް އުނިވާ ބައި ހަމަޖައްސާނެ ގޮތެއް ރައީސް ވިދާޅެއް ނުވެއެވެ. ރާއްޖެ އޮތީ އިޤުތިޞާދީ ގޮތުން ނާޒުކު ފައްތަރެއްގައި ކަމުގައި ރައީސުލްޖުމްހޫރިއްޔާ ގެންދަވަނީ ވިދާޅުވަމުންނެވެ.
