މިއަހަރުގެ ރޯދަމަހުގެ ތެރޭގައި ބޭއްވުމަށް އިލެކްޝަންސް ކޮމިޝަނުން ކުރިން ހަމަޖައްސަވާފައި އޮތް ބައެއް ބައި އިލެކްޝަންތައްވެސް، އާއްމު އިިންތިޚާބާއި ބެހޭ ޤާނޫނަށް ގެނައި އިސްލާޙާއި އެކު ފަސްކުރެވިފައިވާ ކަމުގައި އިލެކްޝަންސް ކޮމިޝަނުން ވިދާޅުވެއްޖެއެވެ.

އިލެކްޝަންސް ކޮމިޝަންގެ ނައިބު ރައީސް އިސްމާއީލް ޙަބީބު ވިދާޅުވީ، 2024 މާރޗް 17 ވަނަ ދުވަހު ބާއްވަން އިލެކްޝަންސް ކޮމިޝަނުން އިޢުލާން ކުރައްވާފައިވާ ހއ. ތަކަންދޫ ކައުންސިލްގެ އަންހެން މެންބަރު، ނ. ވެލިދޫ ކައުންސިލްގެ މެންބަރު އިންތިޚާބުކުރުމަށް ބާއްވާ ބައި-އިލެކްޝަނާއި، 2024 މާރޗް 30 ވަނަ ދުވަހު ބާއްވަން އިޢުލާން ކުރައްވާފައިވާ، މ. މަޑުއްވަރީ ކައުންސިލް ގެ ރައީސް އިންތިޚާބު ކުރުމަށް ބާއްވާ ބައި-އިލެކްޝަން ދެން އޮންނާނީ 2024 އެޕްރީލް 21 ވާ އާދިއްތަ ދުވަހުގައި ކަމަށެވެ. އެދުވަހަކީ، ރައްޔިތުންގެ މަޖިލީހުގެ އިންތިޚާބުވެސް ބާއްވަން ހަމަޖައްސާފައިވާ ދުވަހެވެ.

އިލެކްޝަންސް ކޮމިޝަންގެ ނައިބު ރައީސް އިސްމާއީލް ޙަބީބު ވިދާޅުވީ، ބައި-އިލެކްޝަންތައް ބޭއްވުންވެސް ފަސްކުރީ، އިންތިޚާބުތަކާބެހޭ ޢާންމު ޤާނޫނަށް 5 ވަނަ އިޞްލާޙު ގެނައުމުގެ ޤާނޫނުގައި، އެއްވެސް އިންތިޚާބެއް ރޯދަމަހު ބާއްވައިގެން ނުވާނެ ކަމަށާއި، ރޯދަމަހުގައި އިންތިޚާބެއް ބާއްވަން ޖެހޭ ޙާލަތުގައި، އެ އިންތިޚާބެއް ބާއްވަންވާނީ ރޯދަމަސް ނިމި، 10 ދުވަސް ފަހުން ކަމަށް ކަނޑައެޅުއްވުމާ ގުޅިގެން ކަމަށެވެ.

އަދި މި 3 ބައި-އިލެކްޝަން ގެ ވޯޓުލުން ފެށޭނީވެސް ހެނދުނު 08:00 ން ހަވީރު 04:00 އަށް ކަމަށާއި، ވޯޓުގުނަން ފަށާނީ އެދުވަހުގެ ހަވީރު 4:30 ގެ ފަހުން ކަމުގައިވެސް ޙަބީބު ވިދާޅުވިއެވެ.