ރޭ ދަންވަރު ހުޅުމާލޭގެ މަގުމަތީގައި ބާއްވާފައި އޮތް އިމިގްރޭޝަންގެ ވެހިކަލެއްގައި ސައިކަލެއް ޖެހި ނުރައްކާތެރި އެކްސިޑެންޓެއް ހިނގައި ޒުވާނަކަށް ވަރަށް ބޮޑަށް އަނިޔާވެއްޖެއެވެ.

ފުލުހުންގެ އިދާރާއިން ވިދާޅުވީ މިހާދިސާ ހިނގާފައި ވަނީ ރޭ ދަންވަރު ހުޅުމާލޭގައި ހުންނަ އިމިގްރޭޝަންގެ ޑިޓެންޝަން ސެންޓަރު ކައިރީގައި ކަމަށެވެ. އެކްސިޑެންޓްވެ އަނިޔާވީ އުމުރުން 19 އަހަރުގެ ދިވެހި ފިރިހެނަކަށް ކަމަށާއި، އޭނާއަށް ޓްރީޓޮޕް ހޮސްޕިޓަލްގައި ފަރުވާދެމުންދާ ކަމުގައިވެސް ފުލުހުންގެ އިދާރާއިން ވިދާޅުވިއެވެ. އެނގިފައިވާ ގޮތުގައި އެކްސިޑެންޓްގައި އެޒުވާނާއަށް ވަނީ ސީރިއަސް އަނިޔާތަކެއް ލިބިފައެވެ.

އެކްސިޑެންޓްގައި ސައިކަލުވެސް ބޭނުން ނުކުރެވޭ ވަރަށް ހަލާކުވި އިރު، އިމިގްރޭޝަންގެ ވޭނަށްވެސް ވަނީ ގެއްލުންތައް ލިބިފައެވެ.

ފުލުހުންގެ އިދާރާއިން ވިދާޅުވީ، މިއެކްސިޑެންޓް ހިނގާފައި ވަނިކޮށް ހުޅުމާލެތެރެ ޕެޓްރޯލް ކުރުމުގައި ހަރަކާތްތެރިވި ފުލުހުންނަށް ފެނިފައި ވަނީ ރޭ މެންދަމުން އަލިވެ، 2:30 ހާއިރުގައެވެ. 

މިއެކްސިޑެންޓްގެ މައްސަލަ ފުލުހުން އަންނަނީ ތަޙްޤީޤުކުރަމުންނެވެ.