މިދިޔަ ހުކުރު ދުވަހު ސްޕެއިންގެ އަންހެން ޓްރެވަލް ބްލޮގަރަކު އިންޑިއާގައި ރޭޕްކުރި މައްސަލައިގައި ހަތަރު މީހަކު ހައްޔަރުކޮށްފިއެވެ. ސްޕެއިންގެ މި ބްލޮގަރ އިންޑިއާއަށް ދިޔައީ، އޭނާގެ ފިރިހެން ޕާޓްނަރާއެކު ދެކުނު އޭޝިއާއަށް ކުރަމުންދާ ދަތުރުގައި ސްރީލަންކާގެ ޓުއާ ނިންމުމަށްފަހުއެވެ. 

މި ހާދިސާ ހިނގާފައިވަނީ ހުކުރު ދުވަހުގެރޭ ހޭދަކުރުމަށް ޓެންޓު ޖަހައިގެން އޭނާގެ ޕާޓުނަރާއިއެކު އިންޑިއާގެ އިރުމަތިން، ދުމްކާ ސަރަހައްދުގެ ޖަރުޚަންދުގައި ތިއްބައި، ހަތް މީހުންގެ ގްރޫޕަކުންނެވެ.

ޖަރުޚަންދުގެ ޕޮލިސް ޗީފް، އަޖޭ ކުމާރު ސިންގު ހާމަކޮށްފައިވާ ގޮތުގައި، މި ހާދިސާގައި ހިމެނޭ ހުރިހާ އެންމެން މިހާރުވަނީ ދެނެގަނެވިފައެވެ. އަދި ބާކީ ތިބި ތިން މީހުން ވަރަށް އަވަހަށް ހައްޔަރު ކުރާނެކަމަށް ވެސް އޭނާ ބުނެފައިވެއެވެ. 

މި ހާދިސާއަށްފަހު 28 އަހަރުގެ ސްޕެއިންގެ ބްލޮގަރ ކުރި އިންސްޓަގްރާމް ޕޯސްޓެއްގައި ބުނާ ގޮތުން، އޭނާއާއި ޕާޓުނަރަށް އަނިޔާކޮށް، އެމީހުންގެ ބައެއް އެއްޗެތި ވެސް އެ ގްރޫޕުން ފޭރިގެންފައިވެއެވެ. އަދި އެމީހުން މާ ބައިވަރު އެއްޗެހިތަކެއް ފޭރިގަންނަން އުޅެފައިނުވަނީ، އެމީހުންގެ ބޭނުމަކަށްވީ އޭނާ ރޭޕްކުރުން ކަމުގައިވާތީކަމަށް ވެސް، އެ ޕޯސްޓުގައި ބުނެފައިވެއެވެ. 

ރޭޕްކުރި ބްލޮގަރުގެ ޕާޓުނަރ ސޯޝަލް މީޑިއާގައި ކުރި ޕޯސްޓެއްގައި ވާގޮތުން، އޭނާގެ ބޮލުގައި ހެލްމެޓަކުން ވަރަށް ގިނައިން ތަޅާފައިވެއެވެ. އަދި މިކަމުގެ ސަބަބުން އޭނާގެ އަނގަމަތި ވަރަށް ބޮޑަށް ފަޅައިގެން ގޮސްފައިވާކަމަށް ވެސް ބުނެފައި ވެއެވެ. 

މި ފަތުރުވެރިންނަށް އެހީތެރިވެ ހޮސްޕިޓަލަށް ގެންގޮސްދީފައިވަނީ، އެ ސަރަހައްދު ފެޓްރޯލް ކުރަމުން ދިޔަ ކާރަކަށް ފެނިގެނެވެ. 

ޖިންސީ ފުރައްސާރަ ކުރުމަކީ އިންޑިއާގައި އާންމު ކަމެކެވެ. އެވަރެޖުކޮށް ދުވާލަކު 90 ރޭޕް ކޭސް އިންޑިއާގައި ރިޕޯޓު ކުރެއެވެ. ރާޖާސްތާނާއި، އުއްތަރު ޕްރަދޭޝް އަދި މަދްޔާ ޕްރަދޭޝްއަކީ މިފަދަ ކޭސްތައް އެންމެ ގިނައިން ރިޕޯޓުކުރާ ސަރަހައްދުތަކެވެ.